Një fenomen i rrallë dhe magjepsës është shfaqur këtë të martë përgjatë bregdetit të Portugalisë, duke tërhequr vëmendjen e pushuesve dhe ekspertëve të motit. Një “re rrotulluese” (e njohur si roll cloud) u formua në horizont, duke lëvizur ngadalë mbi ujë si një valë e bardhë në qiell.
Pamjet e kapura në zonën mes Peniche dhe Póvoa de Varzim tregojnë një formacion të gjatë dhe cilindrik reje që rrotullohet mbi boshtin e vet, pa qenë pjesë e ndonjë stuhie. Spektakli natyror u shfaq për disa minuta dhe u shoqërua me erëra të papritura dhe ndërrim të shpejtë të kushteve atmosferike.
Sipas meteorologëve, kjo re unike formohet kur ajri i ftohtë rrëshqet mbi ajrin e ngrohtë dhe të lagësht pranë sipërfaqes, duke shkaktuar kondensimin e avujve të ujit në formën e një cilindri të gjatë. Ky fenomen nuk është i zakonshëm për rajonin e Portugalisë dhe ndodh më shpesh në vende si Australia apo Kanadaja.
Eksperti portugez i motit, Mário Marques, shpjegoi se temperatura ekstremisht e lartë në vend – që në disa zona ka kaluar 40°C – ka krijuar kushtet ideale për këtë fenomen të rrallë.
Instituti Portugez i Meteorologjisë (IPMA) konfirmoi formimin e resë rrotulluese përmes pamjeve satelitore, duke e cilësuar si një shfaqje të pazakontë, por tërësisht natyrore dhe të padëmshme.
Ky moment i rrallë është bërë viral në rrjetet sociale, ku shumë qytetarë kanë ndarë video e foto me përshkrime si “valë qiellore”, “tsunami në ajër” apo “mrekulli atmosferike”.
