Ndërsa bota e lidh zakonisht Rumaninë me Drakulën, historia e vampirëve nis, të paktën zyrtarisht, jo në Transilvani, por në një fshat të vogël në Serbi. Pikërisht në Kisiljevo, 300 vite më parë, është dokumentuar për herë të parë fenomeni i një “vampiri” – dhe pikërisht aty është regjistruar zyrtarisht për herë të parë fjala “vampir” në një dokument europian.
Sot, ky fshat i vogël në lindje të Serbisë po kërkon të rimarrë titullin si djepi i vampirëve, duke shpresuar të tërheqë turistë të pasionuar pas historive të errëta dhe të mbuluara me mister.
Legjenda e Petar Blagojević
Sipas kronikave lokale, në vitin 1725, banorët e Kisiljevos shkuan në qytetin Veliko Gradiste për të kërkuar leje nga autoritetet austriake të hapnin varrin e një fshatari të quajtur Petar Blagojević, i cili, sipas tyre, ngrihej natën nga varri dhe vriste njerëz të fshatit. Në vetëm pak ditë, kishin humbur jetën tetë persona.
Historiani Nenad Mihajlović shpjegon se kjo ngjarje është e dokumentuar zyrtarisht dhe mban firmën e një oficeri austriak, Johan Frombald, që mbikëqyri hapjen e varrit. Raporti, i publikuar më pas në gazetën austriake “Wienerisches Diarium” më 21 korrik 1725, përmend për herë të parë fjalën “vampir”.
View this post on Instagram
Pamje tronditëse nga varri
Sipas dëshmive të asaj kohe, trupi i Blagojević ishte i paprekur, me gjak të freskët që i rridhte nga goja dhe veshët. “Kur i ngulën huin prej druri dëllinje në trup, gjaku shpërtheu. Aty u bindën të gjithë që kjo nuk ishte shaka”, tregon kronikani lokal Mirko Bogicević, ndërsa tregon varrin e supozuar të vampirit në një pjesë të braktisur dhe të mbuluar me shkurre të varrezës së vjetër të fshatit.
“Turizëm i errët” apo magji kulturore?
Autoritetet lokale po përpiqen të kthejnë këtë histori në një atraksion turistik. “Disa e quajnë ‘turizëm i errët’, por unë preferoj ta quaj ‘turizëm mistik’”, thotë Dajana Stojanović, drejtore e Zyrës së Turizmit në Veliko Gradiste. “E gjithë kjo zonë është e mbushur me mite, legjenda dhe mistere.”
Edhe kryetari i bashkisë, Dragan Milić, e pranon se kjo histori është një aset i pashfrytëzuar. “Vampiri i Kisiljevos, Petar Blagojević, është një potencial i madh turistik. Ne po punojmë që të tërheqim investitorë që ta zhvillojmë këtë projekt.”
Përtej legjendës
Në fshat po diskutohet mundësia e transformimit të një mulliri të vjetër afër varrezës në hotel tematik për turistët. Po ashtu, mendohet krijimi i tureve që përfshijnë varrin e vampirit dhe Liqenin e Argjendtë, ku besohet se janë shpërndarë hirin e trupit të djegur të Blagojević.
“Serbia ka të drejtë të mbajë titullin e vendit të parë të vampirëve. Kjo nuk është thjesht legjendë. Është një histori e dokumentuar, që sot po na ndihmon të rindërtojmë identitetin turistik të rajonit tonë,” përfundon Mihajlović.
