Reshjet e dendura të shiut në Ishullin Hormuz, në jug të Iranit, kanë krijuar një fenomen të pazakontë natyror, duke e kthyer vijën bregdetare dhe ujërat përreth në një ngjyrë të kuqe të thellë.
Pamjet mbresëlënëse janë regjistruar më 16 dhjetor dhe janë shpërndarë gjerësisht në rrjetet sociale, duke tërhequr vëmendjen e mediave ndërkombëtare. Sipas raportimeve, shiu ka shpëlarë sasi të mëdha të tokës karakteristike të kuqe të ishullit drejt detit.
Ishulli Hormuz njihet për përbërjen e tij unike gjeologjike, ku toka është e pasur me oksid hekuri, element që i jep ngjyrën karakteristike të kuqe. Gjatë reshjeve intensive, kjo tokë përzihet me ujin dhe derdhet në det, duke krijuar pamje që duken pothuajse surrealiste.
Ekspertët theksojnë se bëhet fjalë për një fenomen natyror, jo për ndotje apo rrezik mjedisor, ndërsa zona është e njohur prej vitesh për këtë dukuri që shfaqet kryesisht pas shirave të rrëmbyeshëm.
Hormuz konsiderohet një nga ishujt më të veçantë të Iranit, jo vetëm për pozicionin strategjik në Ngushticën e Hormuzit, por edhe për peizazhet e tij të rralla natyrore, të cilat vazhdojnë të mahnitin vizitorët dhe studiuesit.
