Moti i keq ka goditur rëndë Italinë veriore dhe qendrore, duke shkaktuar shkarje dheu, përmbytje dhe emergjenca të shumta. Ngjarja më e rëndë u regjistrua në Brazzano të Cormons, në provincën e Gorizias, ku një rrëshqitje dheu masive shembi tre banesa.
Nga rrënojat u gjet i pajetë Quirin Kuhnert, 32 vjeç, me origjinë gjermane, ndërsa një tjetër person – një grua 83-vjeçare – vijon të jetë e zhdukur. Një banor tjetër u shpëtua gjallë dhe u transportua në spital me frakturë të rëndë.
Autoritetet lokale deklaruan emergjencë rajonale, ndërsa kërkimet vijojnë me ekipe specializuara, qen kërkues dhe helikopterë.
Evakuime masive dhe përmbytje të rënda
Në zonën e Versa, pas daljes së lumit Torre nga shtrati, rreth 300 persona u evakuuan, me shumë banorë që u detyruan të ngjiteshin në çatitë e shtëpive në pritje të ndihmës.
Dëme të mëdha janë raportuar edhe në Liguria, ku zjarrfikësit e Gjenovës kryen mbi 100 ndërhyrje brenda 24 orëve për shkak të rrëshqitjeve të dheut, murit të shembur dhe rrugëve të ndërprera.
Në Toskana, reshjet e dendura dhe një trombë ajri në zonën e Pistoias shkaktuan dëmtime në çati banesash, shkollash dhe kapanonësh.
Paralajmërime të reja – Italia në alarm
Mbrojtja Civile njoftoi:
- Alarm portokalli në Friuli-Venezia Giulia,
- Alarm i verdhë në 11 rajone, përfshi Emilia-Romagna, Toscana, Lazio, Abruzzo, Puglia, Campania, Basilicata, Molise, Calabria dhe Siçilia.
Reshjet intensive pritet të zhvendosen drejt jugut gjatë ditës së martë, me rrezik të shtuar stuhish, përmbytjesh dhe erërave të forta.
Reagime politike dhe sociale
Zyrtarët italianë, përfshi ministrin Paolo Zangrillo dhe deputeten Debora Serracchiani, shprehën shqetësim të thellë për situatën dhe theksuan se ndryshimet klimatike po e vënë vendin përballë fenomeneve ekstreme gjithnjë e më të shpeshta.
Shumë qytetarë dhe figura publike kanë ngritur shqetësimin se investimet në infrastrukturën mbrojtëse janë të pamjaftueshme, ndërsa dëmet në bujqësi janë të mëdha – mbi 1,000 hektarë tokë bujqësore kanë përfunduar nën ujë vetëm në rajonin e Gorizias.
Emergjencat pritet të vazhdojnë gjatë orëve në vijim, ndërsa ekipet e shpëtimit vijojnë punën pa ndërprerje.
