Për gjeneratën e re, Gen Z (16–27 vjeç), blerjet online nuk janë më një proces kërkimi, por një përvojë vizuale, të menjëhershme dhe të ndikuar nga rrjetet sociale. Një foto e rastësishme në Instagram, një video në TikTok apo një veshje e parë në rrugë mjafton për të ndezur dëshirën për ta blerë menjëherë.
Me afrimin e Black Friday dhe periudhës së ofertave, kjo tendencë është bërë edhe më e dukshme: të rinjtë duan blerje të shpejta, intuitive dhe të udhëhequra nga teknologjia – jo të komplikuara nga filtrat dhe kërkimet e pafundme.
Shopping vizual, jo kërkim tradicional
Sipas të dhënave të GS1 Italy, mbi 71% e Gen Z italiane informohet online para se të blejë, ndërsa 53% përdor mjete të inteligjencës artificiale për të vendosur çfarë të blejë. Dhe jo vetëm kaq: kjo gjeneratë është edhe më e gatshme se të tjerat për të shpenzuar gjatë Black Friday dhe Cyber Monday, duke ndjekur ofertat kryesisht në:
Instagram (51%)
YouTube (45%)
TikTok (42%)
Facebook, ndryshe nga dikur, përdoret tani vetëm nga 17% e të rinjve, duke dëshmuar zhvendosjen e fortë drejt platformave më vizuale.
Whizy, aplikacioni që kthen foton në blerje në 2 sekonda
Sipas Eloisa D’Auria, bashkëthemeluese e aplikacionit të ri Whizy, Gen Z është “gjenerata e parë vërtet vizuale”. Ata nuk duan të shkruajnë çfarë kërkojnë – duan ta shohin.
Whizy funksionon përmes një sistemi të avancuar të inteligjencës artificiale, që njeh një veshje nga një foto e thjeshtë dhe në më pak se dy sekonda tregon ku mund të blihet online ose sugjeron një alternativë identike. Procesi i blerjes përmblidhet në tre hapa:
(Fotografo – zgjedh – blen)
Bashkëthemeluesi tjetër, Niccolò Campana, shpjegon se kjo gjeneratë jeton brenda ritmit të imazheve: gjithçka nis me një shikim të shpejtë dhe kthehet menjëherë në veprim.
E ardhmja e modës është vizuale – dhe e drejtuar nga AI
Me rritjen e teknologjisë së njohjes vizuale, blerjet online po transformohen rrënjësisht. Ajo që dikur kërkonte kërkime të gjata, filtrime, krahasime dhe hapa të panumërt, tani bëhet me një klik, përmes një fotografie.
Për Gen Z, moda nuk është më thjesht trend – është një përvojë vizuale, e menjëhershme dhe e ndërthurur me inteligjencën artificiale. Dhe ky ndryshim po e riformaton të gjithë industrinë e shitjeve online.
