Meqë fusha na emocionon, këtë herë futbollistët e Kombëtares shqiptare mund të japin “asistin” e tyre në qendrat e votimit. Nuk bëhet fjalë për ndonjë ndeshje eliminatore, por për “kampionatin” e madh të zgjedhjeve.
Dhe, si gjithmonë, edhe këtu skuadra është e shpërndarë si formacion i një trajneri që ka vendosur të luajë me titullarët e improvizuar me fletë votimi. Armando Broja, Ivan Balliu, Jasir Asani dhe Mirlind Daku votojnë në Liceun Artistik të Tiranës. Duket se me gjithë golat e tyre “artistikë”, dikush ka vendosur që është koha t’i shohim edhe si “tenorë” të demokracisë. Thonë që Daku do t’i japë një autograf një pianoje që i kujtoi zërin e trajnerit kur bërtet nga stoli. Balliu, që zakonisht shpërndan topa në krah, këtë herë pritet të shpërndajë edhe ndonjë buzëqeshje në kabinën e votimit. Të katërt futbollistët janë të regjistruar për të votuar në Tiranë, ndonëse nuk dihet nëse ata do ta ushtrojnë të drejtën e votës për shkak të angazhimeve me klubet e tyre.
Qazim Laçit i duhet të udhëtojë drejt Dibrës, aty ku është i regjistruar. Si gjithmonë, Laçi nuk harron origjinën dhe votën e jep aty ku ka nisur edhe rrugëtimin e tij jetësor. Kush e di, ndoshta pas votimit ndalet edhe për një pjatë jufka shtëpie. Keidi Bare, mesfushori energjik, po ashtu voton në Fier – vendlindja e tij. Me stilin e tij luftarak, nuk përjashtohet që nëse radha është e gjatë te qendra e votimit, ai ta trajtojë si një duel për topin në mesfushë. Thoma Strakosha, për çudi, nuk do të votojë në stadium, por në Dhërmi. Kjo është prova përfundimtare që edhe portierët kanë nevojë për “relaks politik”. Diku mes detit, Strakosha pritet të bëjë një pritje para kutisë së votimit.
STAFI TEKNIK DHE KAPITENI Trajneri i Kombëtares shqiptare, Silvinjo, dhe ndihmësit e tij, Pablo Zabaleta dhe Doriva, këtë fundjavë nuk do të ndjekin ndonjë analizë teknike apo seancë stërvitore, por kanë mundësinë për të qenë të pranishëm në Lushnjë, aty ku janë të regjistruar për të votuar. Pas marrjes së nënshtetësisë shqiptare, dy brazilianët e famshëm dhe argjentinasi Zabaleta – me një karrierë të pasur në futbollin botëror – mund të ushtrojnë të drejtën e tyre. Lushnja, ndoshta për herë të parë në historinë e saj zgjedhore, do të presë tre ish-lojtarë të Brazilit dhe Argjentinës, që kanë mundësinë të kontribuojnë për Shqipërinë – jo vetëm në sport, por edhe në procesin demokratik. Nga “Maracana” në “Roza Haxhiu”, rruga mund t’i çojë në një kabinë votimi ku nuk ka VAR, por gjithsesi ka përgjegjësi.
Trajneri Silvinjo, gjithmonë me një buzëqeshje në fytyrë, thuhet se ka studiuar edhe fletën e votimit me po aq kujdes sa formacionin për ndeshjet kualifikuese. Zabaleta, që dikur përplasej me Mesin në stërvitje, tani përgatitet të “përplaset” me radhën e votuesve lushnjarë. Ndërsa Doriva, që në mesfushë ka bërë kilometra pa fund, këtë herë mjaftohet me disa hapa deri te kutia e votimit. Për rastësi (ose thjesht shqiptarizim të bukur), një nga shtyllat e Kombëtares, Berat Gjimshiti, do të votojë në shkollën “Kongresi i Lushnjës”, në Tiranë. Duket se Lushnja, në një mënyrë apo tjetër, ka gjetur mënyrën për të mbledhur kuqezinjtë e saj – qoftë në Lushnjë vetë, qoftë në emër nëpër shkollat e kryeqytetit. Gjimshiti, lideri i mbrojtjes, njihet për qetësinë dhe maturinë e tij, cilësi që i shkojnë për shtat edhe në kabinën e votimit. Këtë herë nuk ka për të ndërprerë ndonjë aksion sulmues, por thjesht do të shënojë në fletë, me stilin e tij të qartë dhe të saktë. E vetmja pyetje që mbetet është: a do ta hedhin votën me këmbë të majtë apo të djathtë?/Tema
