Mega-operacioni që mund të ndryshojë Hollywood-in dhe industrinë globale të kinemasë ka hasur tashmë pengesën e parë. Donald Trump ka shprehur publikisht dyshime mbi blerjen gjigante prej 72 miliardë dollarësh, me të cilën Netflix synon të përthithë Warner Bros. Discovery, duke ngritur shqetësime për shkelje të mundshme të ligjeve antitrust.
Qëndrimi i Trump
I intervistuar të dielën në Kennedy Center, në margjinat e një eventi, presidenti amerikan deklaroi:
“Marrëveshja do të duhet të kalojë përmes një procedure dhe do të shohim çfarë do të ndodhë. Bëhet fjalë për një pjesë shumë të madhe tregu. Mund të jetë problem”.
Nyja kryesore lidhet pikërisht me përqendrimin e pushtetit që do të krijohej nga bashkimi i gjigantit më të madh botëror të streaming-ut me një nga shtëpitë më ikonike të prodhimit hollywoodian. Bashkimi i dy kompanive do të kontrollonte një pjesë shumë të madhe të tregut të argëtimit, nga prodhimi deri te shpërndarja e përmbajtjeve, duke ngritur pikëpyetje serioze mbi konkurrencën dhe pluralizmin e ofertës.
Trump tha gjithashtu se së fundmi ka takuar bashkë-CEO-n e Netflix, Ted Sarandos, por theksoi se përpara se të shprehë një qëndrim përfundimtar do të konsultohet me “disa ekonomistë”. Një ndërhyrje jo e zakonshme, pasi zakonisht presidentët nuk ndërhyjnë drejtpërdrejt në çështje antitrust, të cilat janë në kompetencë të autoriteteve rregullatore. Megjithatë, Trump deklaroi:
“Do të jem i përfshirë edhe në atë vendim”.
Reagimi i tregjeve
Reagimi nuk vonoi. Në platformën e parashikimeve Polymarket, probabiliteti që Netflix të arrijë të mbyllë blerjen deri në fund të vitit 2026 ra ndjeshëm në 23%, nga rreth 60% që ishte përpara deklaratave të presidentit.
Mbrojtja e Netflix
Jo të gjithë analistët ndajnë shqetësimet e Trump. Netflix po përgatitet për një betejë ligjore dhe rregullatore në disa fronte dhe mbetet e bindur se do të marrë dritën jeshile. Sipas Bloomberg, strategjia e kompanisë do të fokusohet në faktin se tregu i streaming-ut përfshin edhe gjigantë të tjerë si Amazon Prime dhe Walt Disney, duke provuar se konkurrenca mbetet e fortë.
Një tjetër argument i Netflix është se 75% e abonentëve të HBO Max janë tashmë klientë të Netflix, çka tregon se dy platformat janë më tepër plotësuese sesa konkurrente. Blerja e Warner Bros. do t’i mundësonte Netflix-it uljen e kostove të prodhimit, optimizimin e teknologjisë dhe krijimin e paketave të përbashkëta Netflix-Max, me çmime potencialisht më të ulëta për konsumatorët.
Kundëroferta e Paramount
Rivali kryesor i Netflix është Paramount, e cila pas deklaratave të Trump ka rritur ofertën duke propozuar një blerje publike për 30 dollarë për aksion, duke vënë në dispozicion 18 miliardë dollarë cash më shumë se oferta e Netflix.
Pengesat nga Evropa
Operacioni duhet të kalojë edhe filtrin e autoriteteve europiane, ku Antitrust-i i BE-së po përgatit një shqyrtim të thelluar të marrëveshjes. Edhe në Mbretërinë e Bashkuar, përpara njoftimit zyrtar, marrëveshja ka tërhequr vëmendjen e institucioneve: baronesha Luciana Berger, anëtare e Dhomës së Lordëve, i ka kërkuar qeverisë britanike të vlerësojë me kujdes ndikimin në konkurrencë dhe në çmimet për konsumatorët.
