Tensionet mes Izraelit dhe Hamasit janë rindezur sërish, vetëm pak javë pas nisjes së një armëpushimi të brishtë të ndërmjetësuar nga SHBA. Kryeministri izraelit Benjamin Netanyahu urdhëroi ushtrinë të kryejë “goditje të fuqishme” në Gaza, pas një sërë incidentesh që sipas Tel Avivit përbëjnë shkelje të marrëveshjes nga ana e Hamasit.
Sipas burimeve të Associated Press, Izraeli raportoi se militantët e Hamasit kanë hapur zjarr ndaj forcave izraelite në jug të Gazës, ndërsa organizata palestineze ka kthyer mbetjet mortore të një pengu që, sipas Izraelit, ishte identifikuar më parë dhe ishte varrosur. Netanyahu e cilësoi këtë akt si “shkelje të qartë të armëpushimit”.
Në qytetin e Rafahut, trupat izraelite janë qëlluar dhe kanë kthyer zjarrin, duke thelluar pasigurinë mbi qëndrueshmërinë e armëpushimit. Aktualisht, ende 13 trupa pengjesh ndodhen në Gaza. Hamasi pretendon se është duke i kërkuar ato mes rrënojave të shumta të luftës, ndërsa Izraeli e akuzon për qëllim të qëlluar vonesash.
Ndërkohë, në Khan Younis, një ekip egjiptian me makineri të rënda po ndihmon në kërkimin e trupave të mbetur të pengjeve. Pamjet nga terreni tregojnë militantë të armatosur që transportojnë një qese të bardhë, e dyshuar se përmbante trupin e një pengu.
Kjo është hera e dytë që Izraeli ngre akuza të tilla që nga nisja e armëpushimit më 10 tetor. Në javët e para të marrëveshjes, një nga trupat e dorëzuar nga Hamasi rezultoi të ishte i një palestinezi të panjohur.
Netanyahu konfirmoi se trupi i fundit i kthyer i përkiste Ofir Tzarfatit, një i ri izraelit që ishte rrëmbyer në festivalin Nova më 7 tetor 2023, gjatë sulmit të Hamasit që la pas 1,200 viktima dhe 251 pengje. Familja e Tzarfatit tha se është hera e tretë që u duhet të hapin varrin për riidentifikim dhe rivarrim të djalit të tyre.
Në këmbim të 15 trupave të pengjeve të dorëzuara që nga nisja e armëpushimit, Izraeli ka kthyer 195 trupa palestinezësh në Gaza, ndërsa në fazën e parë të marrëveshjes u liruan rreth 2,000 të burgosur palestinezë në këmbim të 20 pengjeve të gjallë.
—
Bastisje në Bregun Perëndimor: Tre palestinezë të vrarë në Jenin
Në një zhvillim të ndarë nga Gaza, forcat izraelite vranë tre militantë palestinezë në një operacion në qytetin Jenin, një zonë e njohur për aktivitetet e armatosura.
Policia izraelite deklaroi se tre personat u qëlluan teksa dilnin nga një shpellë, e cila më vonë u godit edhe nga një sulm ajror për ta shkatërruar. Ushtria tha se militantët ishin përfshirë në “aktivitete terroriste”, pa dhënë detaje të mëtejshme.
Hamas konfirmoi se dy prej viktimave ishin anëtarë të brigadave të saj të armatosura, ndërsa i treti u përshkrua si “shok lufte”.
—
Një luftë që nuk shuhet
Sipas Ministrisë së Shëndetësisë në Gaza, mbi 68,500 palestinezë kanë humbur jetën që nga fillimi i luftës më 7 tetor 2023, ndërsa mijëra të tjerë janë zhvendosur. Shumica e viktimave janë civilë, mes tyre gra dhe fëmijë, ndërsa Izraeli vazhdon të mohojë përgjegjësinë për shifrat pa ofruar një bilanc alternativ.
Me urdhrin e ri të Netanyahut për “goditje të fuqishme”, armëpushimi i brishtë duket se është në prag të shpërbërjes, duke rihapur rrugën për një tjetër raund të përgjakshëm përplasjesh në Gaza.
