Policia e Shtetit ka lëshuar një apel të rëndësishëm për qytetarët dhe përdoruesit e rrugës, pas përkeqësimit të kushteve të motit në disa qarqe të Shqipërisë. Erëra të forta, reshje shiu dhe stuhi kanë shkaktuar problematika të ndryshme, si përmbytje të akseve rrugore, thyerje të pemëve dhe përhapje të inerteve.
Në një njoftim për shtyp, Policia kërkoi që qytetarët të tregojnë kujdes të shtuar dhe të respektojnë me rigorozitet rregullat e qarkullimit rrugor. Drejtuesit e automjeteve dhe motomjeteve u këshilluan të ngadalësojnë shpejtësinë, ndërsa këmbësorët duhet të jenë të kujdesshëm për rënien e inerteve, pemëve dhe sendeve të tjera që mund të bien nga lartësitë.
Në të gjithë vendin, punonjësit e Policisë janë të pranishëm në terren për të ofruar ndihmën dhe mbështetje qytetarëve. Policia i kërkoi gjithashtu qytetarëve që të bashkëpunojnë me ta në rastet e bllokimit të rrugëve ose situatave të tjera të shkaktuara nga moti i keq, për të mundësuar koordinimin me strukturat e tjera shtetërore.
Për çdo rast nevoje, qytetarët mund të telefonojnë në numrin emergjent 112 dhe të respektojnë udhëzimet e Policisë.
