Athinë – Greqia u zgjua të mërkurën nën ndikimin e motit ekstrem, pasi reshjet e dendura të shiut dhe erërat e forta përfshinë pjesën më të madhe të vendit, duke shkaktuar viktima, përmbytje dhe ndërprerje të jetës së përditshme.
Në qytetin bregdetar Astros, në Peloponezin lindor, një oficer i rojës bregdetare humbi jetën pasi u godit nga një valë e fuqishme, teksa po u kërkonte peshkatarëve të largoheshin nga porti për shkak të përkeqësimit të motit.
Disa orë më vonë, një tjetër viktimë u regjistrua në periferi të Athinës, në Glyfada, ku një grua humbi jetën pasi ujërat e përmbytjes shtynë automjetin e saj, duke e nxjerrë nga kontrolli.
Sipas autoriteteve, shpejtësia e erës ka kaluar 100 kilometra në orë në disa zona të vendit, duke detyruar pezullimin e lëvizjes së trageteve dhe mbylljen e shkollave në Athinë, si edhe në pjesë të Greqisë perëndimore dhe jugore.
Meteorologët raportuan se disa zona të kryeqytetit grek morën sasinë e reshjeve të barabartë me gjashtë javë shi brenda një dite, duke shkaktuar përmbytje të gjera dhe dëme infrastrukturore.
Autoritetet u kanë bërë thirrje qytetarëve të shmangin udhëtimet e panevojshme, ndërsa Kryeministri Kyriakos Mitsotakis ka shtyrë një udhëtim jashtë vendit për shkak të situatës emergjente. Ndërkohë, ekipet e emergjencës janë angazhuar në terren për të përballuar rrugët e përmbytura dhe dëmet e shkaktuara nga stuhia.
Situata mbetet problematike, ndërsa autoritetet vijojnë monitorimin e motit dhe paralajmërojnë për rrezik të vazhdueshëm në orët në vijim.
