Ilir Meta ka nisur këtë të shtunë një fushatë paralele, të vetën, me 12 kandidatët e Partisë së Lirisë, të përfshirë në listat e koalicionit “PD-ASHM” të drejtuar nga Sali Berisha. Në një mesazh të publikuar nga burgu, ku ndodhet prej tetorit të vitit të kaluar, Meta i kërkon qytetarëve të Tiranës që të japin votën preferenciale për të, në garën që ai e quan “përballje me diktaturën”.
“Unë jam në listë të hapur dhe besoj te Tirana, e cila do të jetë lokomotiva e ndryshimit historik me të paktën 20 deputetë për aleancën tonë ‘PD–ASHM’. Vota për ILIR METAJ, deputet i Qarkut të Tiranës, është një votë e pastër kundër diktaturës”, shprehet ai në videomesazh.
I izoluar në burg, Meta ka ndërtuar një formë alternative të fushatës: “Çdo ditë shkruaj dhe dërgoj 50 deri në 100 letra për shokët e mi, që nga shkolla fillore ‘Kongresi i Lushnjës’, 8-vjeçarja ‘Fan Noli’, gjimnazi ‘Sami Frashëri’, Fakulteti i Ekonomisë, shokëve që nga koha e sportit, për të kërkuar mbështetjen e tyre jo vetëm për Nr. 1, ‘PD–ASHM’, por edhe për Ilir Metaj si deputet i Tiranës”.
Mbështetja më e fortë për Metën vjen nga familja – djali i tij, Besar Metaj, ka shpërndarë një foto ku mban një poster të kandidimit të të atit, në një postim të publikuar nga ish bashkëshortja, Monika Kryemadhi në Instagram. “Bravo Besar Metaj, jam krenare për ty. Voto Ilir Metaj!” – shkruan ajo, duke theksuar se marrja e përgjegjësive është shenjë burrërie.
Nëse arrin të sigurojë mandatin si deputet, Ilir Meta mund të përfitojë imunitetin parlamentar që mund të çojë në lirimin e tij nga burgu. Neni 71 i Kushtetutës së Shqipërisë përcakton se mandati i deputetit fillon në momentin që shpallet nga KQZ dhe për aq kohë sa nuk ka një vendim të formës së prerë, mandati mund t’i japë atij edhe lirinë.
