Situata në Lindjen e Mesme po përshkallëzohet sërish, pavarësisht armëpushimit dyjavor mes SHBA dhe Iranit. Sulmet ajrore izraelite në Liban, veçanërisht në Bejrut dhe periferinë jugore Dahiyeh, kanë shkaktuar mbi 300 të vrarë dhe të plagosur, ndërsa dhjetëra persona mbeten ende nën rrënoja dhe spitalet janë në kolaps.
Sipas autoriteteve libaneze dhe Kryqit të Kuq, bombardimet kanë goditur zona të dendura urbane, duke rritur frikën për një përshkallëzim të ri të konfliktit në rajon. Ndërkohë, Izraeli deklaron se ka goditur qindra objektiva të lidhura me Hezbollah, në një nga operacionet më të forta të muajve të fundit.
Në këtë klimë tensioni, Irani ka reaguar ashpër duke paralajmëruar se çdo hyrje e avionëve amerikanë apo izraelitë në hapësirën e tij ajrore do të konsiderohet shkelje e armëpushimit dhe do të pasohet me “përgjigje vendimtare”. Teherani pretendon gjithashtu se ka rrëzuar një dron izraelit Hermes 900.
Një tjetër zhvillim kritik është mbyllja e sërishme e ngushticës së Hormuzit, një arterie kyçe për transportin global të naftës. Pas sulmeve në Liban, Irani ka ndaluar kalimin e cisternave, duke rritur frikën për krizë energjetike dhe rritje të çmimeve në tregjet ndërkombëtare.
Nga ana tjetër, Presidenti amerikan Donald Trump e cilëson marrëveshjen me Iranin si një “fitore totale”, ndërsa zëvendëspresidenti J.D. Vance paralajmëron se armëpushimi mbetet i brishtë. Negociatat pritet të nisin në Pakistan, në një përpjekje për të shmangur rikthimin e luftës së hapur.
Ndërkohë, reagimet ndërkombëtare janë shtuar: Turqia dhe Katari bëjnë thirrje për paqe të qëndrueshme, Egjipti kërkon ndaljen e sulmeve në Liban, ndërsa SHBA thekson se Libani nuk është pjesë e marrëveshjes së armëpushimit.
Rajoni mbetet në prag të një shpërthimi të ri, ku çdo zhvillim mund të ndikojë jo vetëm sigurinë, por edhe ekonominë globale.
