Fier, 3 maj 2025 — Kreu historik i Partisë Demokratike, Sali Berisha, mbylli sot fushatën elektorale të PD në qytetin e Fierit me një miting entuziast, ku lëshoi akuza të forta ndaj kryeministrit Edi Rama.
Në fjalimin e tij, Berisha deklaroi se Rama i shmanget përballjes me qytetarët dhe debatit publik, duke e cilësuar si “burrec dy metra i gjatë që nuk guxon të ballafaqohet para jush, në studio televizive apo në sheshe”. Ai ironizoi spektaklet e qeverisë gjatë fushatës, përfshirë “vallet e Lubi Ballukut, piskamat e Zegjinesë dhe Lamborghinin e Noizit”, duke theksuar se ndërkohë problemet reale të vendit dhe skandalet me miliona euro mbeten pa përgjigje.
Berisha solli në vëmendje aferat e përfolura financiare si djegësin e Tiranës dhe Fierit, gjobën e arbitrazhit me kompaninë Beketti, si dhe shpenzimet luksoze qeveritare, duke i quajtur këto “taksat dhe djersën e qytetarëve”. Sipas tij, një kryeministër që kërkon votën duhet të ketë kurajën të dalë para popullit dhe të japë llogari për sukseset e dështimet.
“Fitorja është në duart tuaja. Fitorja pret që ju ta çoni në çdo zemër shqiptare,” u shpreh Berisha, duke e quajtur programin e PD “më të mirin që Shqipëria ka patur ndonjëherë”.
Mitingu u mbyll me thirrjet “Fitore, fitore, fitore!”, ndërsa PD i bën thirrje qytetarëve të Fierit dhe gjithë vendit të votojnë më 11 maj për një ndryshim të madh.
