Presidenti i Venezuelës, Nicolás Maduro, është paraqitur për herë të parë para një gjykate federale në Nju Jork, ku është deklaruar i pafajshëm ndaj akuzave për trafik droge, narko-terrorizëm dhe armëmbajtje. Gjatë seancës, Maduro ka deklaruar se “është ende president” dhe se është “rrëmbyer nga shtëpia e tij në Karakas”, duke e cilësuar veten si “i burgosur lufte”.
Seanca gjyqësore, që zgjati rreth 40 minuta, u shoqërua me tensione brenda sallës, përfshirë një përplasje verbale mes Maduron dhe një personi nga publiku, i cili u largua nga gjykata pas ndërhyrjes së autoriteteve. Maduro dhe bashkëshortja e tij, Cilia Flores, u paraqitën nën masa të rrepta sigurie, të veshur me rroba burgu dhe me pranga në duar e këmbë.
Avokati i Cilia Flores deklaroi se ajo ka pësuar dëmtime të konsiderueshme gjatë momentit të kapjes në Venezuelë, duke përmendur mavijosje dhe dyshime për fraktura në brinjë. Gjykata urdhëroi që asaj t’i sigurohet trajtimi i nevojshëm mjekësor.
Jashtë ndërtesës së gjykatës në Manhattan, qindra protestues dhe kundërprotestues u mblodhën me pankarta dhe thirrje të kundërta. Disa kërkonin ndërhyrjen e SHBA-së jashtë Venezuelës, ndërsa të tjerë falënderonin presidentin amerikan Donald Trump për operacionin që çoi në kapjen e Maduron.
Ndërkohë, në Karakas, pritet që Delcy Rodríguez të betohet përpara Asamblesë Kombëtare si udhëheqëse e përkohshme e vendit. Situata është diskutuar edhe në një seancë emergjente të Këshillit të Sigurimit të OKB-së, ku diplomatë të shumtë kanë ngritur shqetësime për ligjshmërinë ndërkombëtare të veprimeve të SHBA-së.
Sipas aktakuzës amerikane, Maduro dhe bashkëshortja e tij akuzohen se për më shumë se 25 vite kanë bashkëpunuar me kartele ndërkombëtare droge për të trafikuar lëndë narkotike drejt Shteteve të Bashkuara. Autoritetet amerikane paralajmërojnë se procesi gjyqësor mund të zgjasë me vite, ndërsa vetë Maduro këmbëngul se mbetet president legjitim i Venezuelës.
