Çdo natë, pas një dite të zakonshme pune, “Chen” – një aktivist anonim nga Kina lindore – futet në një botë të errët dhe të tmerrshme, në përpjekje për të zbuluar një rrjet ndërkombëtar që torturon dhe vret mace për kënaqësi seksuale dhe përfitime financiare.
Hetimi ekskluziv i CNN zbulon një industri globale në rritje që shpërndan video mizore me përmbajtje torturuese ndaj maceve, kryesisht për konsumatorë me prirje të rënda sadiste seksuale – një devijim i njohur si “zoosadizëm”.
Një rrjet global, i fshehur në Telegram dhe YouTube
Grupet që shpërndajnë këtë përmbajtje janë vendosur në platforma si Telegram, X dhe YouTube, duke i trajtuar abuzuesit si “yje” dhe duke inkurajuar gara për mënyra gjithnjë e më brutale të vrasjes së maceve.
Sipas organizatës aktiviste Feline Guardians, rrjetet janë të strukturuara dhe funksionojnë si treg të zi, ku përdoruesit mund të porosisin video torturash sipas dëshirës për çmime që arrijnë deri në 1,300 dollarë.
Kina, epiqendra e mizorisë
Shumë nga torturuesit ndodhen në Kinë, ku mungesa e ligjeve kundër abuzimit ndaj kafshëve u ka dhënë imunitet të plotë. Brenda këtyre rrjeteve, qarkullojnë qindra video të reja çdo muaj – vetëm në janar dhe shkurt të 2025, janë postuar mbi 500 video të reja.
YouTube ka reaguar duke hequr disa kanale, por CNN zbuloi se përmbajtje të tillë është shpërndarë edhe në platforma të tjera si X (ish-Twitter), Instagram dhe Telegram.
Aktivistët përballë rrezikut
Aktivistët si Chen në Kinë dhe Lara në Londër, që operojnë në kuadër të Feline Guardians, punojnë në heshtje, duke rrezikuar sigurinë e tyre për të zbuluar identitetet e torturuesve dhe për të ndaluar rrjetin.
Ata përshkruajnë tortura makabre – mace që digjen për së gjalli, copëtohen, dhe edhe më keq, torturohen nga gra që mbathin taka të larta, për të kënaqur fantazitë seksuale të konsumatorëve.
Një nga konsumatorët kinezë, “Zhang”, pranoi për CNN se këto video i japin më shumë kënaqësi sesa seksi. Ai mban kafshë shtëpiake në shtëpi, por fshehurazi blen video mizore për qindra dollarë.
Kur mizoria kthehet në ideologji
CNN gjithashtu zbuloi lidhje shqetësuese mes rrjeteve të torturimit të maceve dhe grupeve neo-naziste. Në një grup Telegram me emrin “The Eternal Reich”, u shpërndanë video me përmbajtje ekstreme, që përfshinin edhe abuzime ndaj grave dhe retorikë të urrejtjes.
Ligjet e munguar dhe nevoja për veprim
Shumë vende kanë bërë arrestime, përfshirë SHBA, Kanada, Turqi dhe Mbretërinë e Bashkuar. Në Turqi, ku rrugët janë plot me mace, autoritetet arrestuan dhjetëra anëtarë të rrjeteve mizore gjatë 2024.
Megjithatë, në Kinë – një nga vendet më të industrializuara – mungojnë ligje gjithëpërfshirëse për mbrojtjen e kafshëve. Aktivistët dhe akademikët si prof. Peter Li bëjnë thirrje për miratimin urgjent të një ligji kundër mizorisë ndaj kafshëve, për të frenuar këtë trend të rrezikshëm që po dehumanizon një brez të tërë.
Rreziku për shoqërinë
Psikologët dhe kriminologët paralajmërojnë se konsumimi i këtyre përmbajtjeve i desensibilizon njerëzit dhe mund të shndërrohet në rrezik për qenie njerëzore – sidomos gra dhe fëmijë, pasi klithmat e maceve shpesh i ngjasojnë atyre të njerëzve në dhimbje.
“Nëse nuk ndërhyjmë tani,” paralajmëron Lara nga Londra, “këto akte do të bëhen më të përhapura, më metodike dhe më të tmerrshme.”
Redaksionale AIA.AL: Ky material është përkthyer dhe përshtatur nga CNN për të informuar publikun shqiptar mbi një fenomen shqetësues dhe global. Përmbajtja është shumë e ndjeshme dhe qëllimi i publikimit është ndërgjegjësimi për nevojën urgjente të veprimit ligjor dhe etik kundër mizorisë ndaj kafshëve.
