Një moment i jashtëzakonshëm i botës së egër është kapur për herë të parë nga kamerat në dokumentarin më të ri të BBC-së, “Kingdom”, me zërin legjendar të Sir David Attenborough. Pamjet tregojnë një luan që shpëton një hienë shtatzënë nga një tufë qenësh të egër, një skenë e papritur që po komentohet gjerësisht në rrjete sociale si shembull unik i sjelljes ndërmjet grabitqarëve.
Seria, e realizuar përgjatë pesë viteve në Luginën Luangwa të Zambias, ndjek jetën e katër familjeve rivale grabitqarësh – luanë, hiena, leopardë dhe qen të egër – duke dokumentuar momente të rralla dhe shpesh prekëse nga jeta e tyre në natyrë.
“Vetëm natyra mund të shkruante një skenar të tillë,” – u shpreh producenti ekzekutiv Mike Gunton, duke theksuar se shumë nga sjelljet e kapura nuk janë parë më parë në dokumentarë të tjerë të BBC-së.
Në seri përfshihen edhe skena dramatike, si kafshë që mbijetojnë nga kurthet me tela, qenie që përshtaten me plagë fatale, dhe momente prekëse si kthimi i një qeni të egër me tre këmbë në tufën e tij.
Krahas spektaklit natyror, “Kingdom” mbart edhe një mesazh të fortë për mbrojtjen e kafshëve të egra, duke nxjerrë në pah kërcënimet që u vijnë nga humbja e habitateve dhe gjuetia ilegale.
Ekspertët e Zambia Carnivore Programme, të cilët bashkëpunuan në xhirime, shpresojnë se ky dokumentar do të ndihmojë në forcimin e ndërgjegjësimit global për ruajtjen e specieve të rrezikuara.
“Është një mesazh optimizmi përballë sfidave serioze të natyrës,” tha Dr. Matthew Becker, këshilltar shkencor i projektit.
Dokumentari “Kingdom” do të transmetohet këtë të diel në BBC One, në orën 18:20 GMT, dhe do të jetë i disponueshëm edhe në BBC iPlayer
