Në prag të përballjes së shumëpritur me Serbinë, Kombëtarja shqiptare ka marrë një ofertë që mund t’i ndryshojë fatin – dhe jo, nuk është ndonjë lojtar i ri nga Premier League, por vetë Selami Jenisheri!
Ish-deputeti dhe legjenda e memeve shqiptare i ka dërguar një letër dramatike dhe paksa magjike trajnerit brazilian Sylvinho, duke i kërkuar që për disa ditë të marrë ai komandën e stërvitjeve. Arsyeja? Ai thotë se ka shpikur një metodë stërvitjeje “më të fortë se FIFA dhe më teknike se vetë tekniku brazilian”.
“Më jepni vetëm 3-4 ditë dhe do shihni se si sulmuesit tanë do bëjnë driblimin si Messi dhe do shënojnë si Haaland. Kjo është e vërtetë e madhe,” – shkruan Jenisheri, me bindje të thellë shkencore.
Kjo nuk është hera e parë që Jenisheri ofron “superfuqitë” e tij për Kombëtaren. Më parë ka trokitur edhe në zyrën e Armando Dukës, por me sa duket, dera atje ka qenë me sistem “antimrekulli”. Kështu që, këtë herë ai vendosi të shkojë direkt te Sylvinho, sepse siç thotë vetë: “Shqipëria me Serbinë nuk është thjesht ndeshje, është mision kombëtar!”
Burime të pakonfirmuara thonë se Sylvinho e ka lexuar letrën, është ndalur për 10 sekonda në heshtje, pastaj ka pyetur: “A është ky ndonjë personazh nga ndonjë reality show?”
Për momentin, FSHF nuk ka reaguar zyrtarisht, por në kampin e Kombëtares është vënë re një rritje e papritur në përdorimin e fjalës “progress” dhe “shprehi”, që ndoshta tregon ndikimin e parë të metodës Jenisheri në ambientin kuqezi.
Deri atëherë, presim me padurim ndeshjen me Serbinë dhe – pse jo – ndoshta edhe debutimin e Selamit në pankinën shqiptare. Vetëm kujdes, mos i lini shumë afër VAR-it, se mund ta transformojë në makinë stërvitjeje!
