Lahuta, një nga instrumentet më të vjetra të trashëgimisë muzikore shqiptare, është shpallur zyrtarisht pasuri e trashëgimisë kulturore jomateriale dhe është përfshirë në Listën e UNESCO-s për mbrojtje urgjente.
Lajmi u bë i ditur nga kryeministri Edi Rama, i cili njoftoi se ky vendim vlerëson dhe mbron një simbol të rëndësishëm të identitetit kulturor shqiptar.
Sipas njoftimit, përfshirja në listën e UNESCO-s synon jo vetëm njohjen ndërkombëtare të lahutës, por edhe ruajtjen, transmetimin dhe rigjallërimin e traditës së saj, e cila rrezikon të humbasë për shkak të mungesës së praktikimit ndër breza.
Lahuta ka qenë ndër shekuj pjesë thelbësore e epikës shqiptare, veçanërisht në trevat veriore, duke shoqëruar këngët kreshnike dhe rrëfimet historike të trashëguara gojarisht.
Vendimi i UNESCO-s konsiderohet një hap i rëndësishëm për mbrojtjen e trashëgimisë shpirtërore shqiptare dhe për promovimin e saj në arenën ndërkombëtare.
