Një ditë pas vendimit të Gjykatës Kushtetuese për pezullimin e zgjedhjeve vendore për bashkinë e Tiranës, KQZ ka njoftuar ndërprerjen e përgatitjeve të procesit zgjedhor në bashkinë e kryeqytetit, ndërsa sqaron se ky proces do të vijojë normalisht në 5 bashkitë e tjera të vendit.
Në një konferencë për medie, kreu i KQZ, Ilirjan Celibashi deklaroi se është çështje e kompetencës së Gjykatës Kushtetuese për t’u shprehur mbi ankimin që është bërë nga Erion Veliaj në lidhje me vendimin për shkarkimin e tij nga detyra e Kryebashkiakut të Tiranës.
“Në zbatim të vendimi të Gjykatës Kushtetuese, që dje, KQZ ka ndërprerë dhe pezulluar përgatitjet që lidhen me procesin zgjedhor në bashkinë e Tiranës, ndërkohë vijon normalisht procesi i përgatitjes për 5 bashkitë e tjera. Çdo veprim i KQZ i çdolloj natyre që lidhet me përgatitjet për bashkinë e Tiranës është pezulluar që ditën e djeshme.
Do ishim në shkelje të kushtetutës e kodit zgjedhor nëse KQZ do vazhdonte me procesin përgatitor të zgjedhjeve për bashkinë e Tiranës. Ndaj e thashë, bazuar në urdhërimi e vendimit të Gjykatës Kushtetuese dhe kushdo tjetër që vendimi i GJK i adresohet duhet të respektojë vendimin.
KQZ s’mund të kryejë asnjë lloj veprimi që lidhet me përgatitjet e procesit zgjedhore për zgjedhjet e Tiranës.
Është çështje e kompetencës së gjykatës kushtetuese mbi ankimin që është bërë në kushtetuese nga Veliaj në lidhje me vendimin për shkarkimin e tij. Do vendosë Gjykata Kushtetuese dhe pastaj do shohim për më tej”, deklaroi Celibashi.
Gjykata Kushtetuese pezulloi ditën e djeshme (9 tetor) dekretin e Presidentit Bajram Begaj për zhvillimin e zgjedhjeve të pjesshme për kryetar bashkie në Tiranë, pas ankesës së depozituar nga Erion Veliaj. Gjykata vendosi gjithashtu që seanca plenare publike për ankimimin mbi shkarkimin e Veliajt si kryebashkiak i Tiranës të mbahet më 31 tetor.
Sipas ankimimit të paraqitur nga avokatët e Veliajt një javë më parë në Kushtetuese, dekreti presidencial cilësohej si “contra Constitutionem” (antikushtetues) pasi “cenon garancitë kushtetuese që gëzon një i zgjedhur vendor gjatë procedurës së shkarkimit”.
Më 1 tetor, presidenti Begaj dekretoi 9 nëntorin si datën për zhvillimin e zgjedhjeve të pjesshme për kryetar bashkie në gjashtë bashki të vendit, përfshi edhe Tiranën.
Vendimi i sotëm i Kushtetueses i referohet vetëm zgjedhjeve të pjesshme për Bashkinë e Tiranës. Zgjedhjet në 5 bashkitë e tjera të vendit, Mat, Tepelenë, Cërrik, Berat dhe Vlorë do të mbahen më 9 nëntor, sipas dekretit të firmosur nga presidenti Bajram Begaj.
/rtsh.al/
