Sistemi i Alarmit të Shpejtë për Ushqimin dhe Ushqimin për Kafshë i Bashkimit Europian (RASFF) ka njoftuar për një rrezik të mundshëm mbytjeje nga karamelet e markës “JELLY”, të prodhuara në Japoni.
Sipas njoftimit zyrtar, produktet duhet të hiqen nga tregu, pasi paraqesin rrezik serioz, veçanërisht për fëmijët e vegjël.
“Rrezik i mundshëm mbytjeje, veçanërisht për fëmijët e vegjël, pasi aftësitë e tyre motorike janë të kufizuara dhe për këtë arsye rreziku i gëlltitjes është veçanërisht i lartë”, thuhet në njoftimin e RASFF.
Ku janë tregtuar?
Sipas informacionit të publikuar, ndër vendet ku janë tregtuar këto produkte përfshihen edhe Shqipëria dhe Kosova.
Agjencia e Ushqimit dhe Veterinarisë e Kosovës ka njoftuar konsumatorët për heqjen e produktit nga tregu. Ndërkohë, nga Autoriteti Kombëtar i Ushqimit (AKU) në Shqipëri ende nuk ka një komunikim zyrtar.
Megjithatë, këto produkte mund të gjenden në markete dhe pika tregtimi në vend.
Çfarë duhet të bëjnë konsumatorët?
- Të kontrollojnë me kujdes produktet e blera
- Të shmangin konsumimin e tyre nga fëmijët
- Të njoftojnë autoritetet përkatëse në rast se i hasin në treg
Siguria ushqimore mbetet prioritet, veçanërisht kur bëhet fjalë për produkte që konsumohen nga fëmijët.
