Kryeministri Edi Rama prezantoi këtë javë platformën e re “EuroAgro Albania”, një instrument praktik dhe i domosdoshëm për përgatitjen e sektorit bujqësor dhe ushqimor për tregun e përbashkët europian. Gjatë podkastit “Flasim”, Rama theksoi se kapitujt 11, 12 dhe 13, që lidhen me bujqësinë, janë thelbësorë në procesin e negociatave për anëtarësimin e Shqipërisë në Bashkimin Europian.
“Do të jetë një sfidë e fortë, por ajo që kemi bërë në një dekadë na jep besim dhe forcë se do të bëjmë gjithçka duhet për t’i mbyllur negociatat deri në fund të vitit 2027”, u shpreh Rama. Kryeministri kujtoi se dhjetë vjet më parë, vetëm 5,600 fermerë përfitonin mbështetje simbolike nga shteti, ndërsa sot janë 67,500 fermerë që marrin çdo vit mbështetje reale, e cila ndikon drejtpërdrejt në zhvillimin e fermave të tyre.
Rama shtoi se eksportet, dikur privilegj i një grushti fermerësh, sot shkojnë në 80 vende të botës dhe kanë kaluar gjysmë miliard euro. Për më tepër, raporti i deficitit tregtar në sektorin ushqimor ka pësuar një përmirësim të ndjeshëm, duke shkuar nga 1 eksport dhe 9 import në 1 eksport dhe 3 import.
Sipas Kryeministrit, sfidat e sotme janë të një niveli tjetër dhe kërkojnë mjete moderne dhe informacion të qartë. “EuroAgro Albania” nuk është një faqe interneti e zakonshme, por një udhërrëfyes hap pas hapi për fermerët dhe bizneset. Platforma ofron informacion mbi standardet, afatet dhe detyrimet konkrete, si dhe shërben si një kanal dialogu i hapur për çdo aktor të sektorit bujqësor dhe ushqimor, duke i ndihmuar ata të përgatiten për kërkesat e tregut europian dhe të avancojnë në rrugën drejt anëtarësimit në Bashkimin Europian.
Kjo iniciativë shënon një hap të rëndësishëm për modernizimin e bujqësisë shqiptare dhe integrimin e saj në ekonominë europiane, duke fuqizuar fermerët dhe duke i lidhur drejtpërdrejt me mundësitë dhe sfidat e tregut të përbashkët.
