Seanca e 20 gushtit respektoi procedurat kushtetuese, por asnjë kandidat i propozuar nga Vetëvendosje nuk mori shumicën. Opozita kritikon taktikat dhe paralajmëron mosfunksionim të institucioneve.
Seanca konstituive e Kuvendit të Kosovës, e zhvilluar më 20 gusht pas një muaji pauzë për shkak të vendimeve të Gjykatës Kushtetuese, ka respektuar procedurat parlamentare, por ka dështuar të zgjedhë kryetarin e Kuvendit.
Kandidatet e propozuara nga Lëvizja Vetëvendosje, Albulena Haxhiu dhe më pas Donika Gërvalla-Schwarz, nuk morën votat e mjaftueshme. Opozita – PDK, LDK, AAK dhe Lista Serbe – refuzoi të mbështesë kandidatët, duke kritikuar qasjen e VV-së dhe procedurat e seancës.
Ekspertët politikë vlerësojnë se situata tregon mungesë të shumicës politike dhe mosgatishmëri për kompromis, duke çuar në një bllokadë institucionale që vazhdon tashmë më shumë se gjashtë muaj. Seanca e radhës është caktuar për 22 gusht në orën 11:00, ndërsa deputetët kanë afat 30 ditor për të konstituar Kuvendin.
