Një histori prekëse që po qarkullon në rrjetet sociale ka emocionuar mijëra njerëz: një kotele e vogël e quajtur Angelito i mbijetoi një prognoze shumë të rëndë dhe sot jeton një jetë të plotë falë përkushtimit të familjes që e shpëtoi.
Kotelja u gjet kur ishte vetëm dhjetë ditëshe nga Diana Rincón. Sipas rrëfimit të saj, kafsha ishte braktisur dhe ndodhej në gjendje kritike: ishte shumë e dobët dhe nuk mund të lëvizte këmbët e pasme. Ajo e dërgoi menjëherë tek veterineri, por diagnoza ishte shokuese.
Veterinerët i thanë se për shkak të paralizës së rëndë maçoku nuk do të mund të kishte një jetë normale dhe zgjidhja që shumë prej tyre sugjeruan ishte eutanazia. Por Diana refuzoi ta pranonte këtë.
“Pas çdo vizite dilja duke qarë. Nuk mund ta bëja këtë”, ka treguar ajo për mediat.
Megjithatë, ajo vendosi të luftonte për jetën e koteles. Filluan muaj të tërë përkujdesjeje intensive: masazhe për të stimuluar muskujt, vitamina, kontrolle të vazhdueshme veterinare dhe ushqyerje me biberon. Angelito u rrit mes kujdesit të familjes dhe shoqërisë së maceve të tjera në shtëpi.
Pak nga pak filluan të shfaqen edhe përmirësimet e para. Edhe pse paraliza mbeti, maçoku vazhdonte të tregonte një energji dhe dëshirë të madhe për të jetuar.
Për ta ndihmuar të lëvizte, familja ndërtoi për Angeliton një karrocë të vogël me rrota, të përshtatur posaçërisht për trupin e tij. Me këtë pajisje, maçoku mundi të lëvizte nëpër shtëpi, të luante dhe të eksploronte ambientin.
Sot, pavarësisht paralizës, Angelito jeton një jetë të lumtur dhe aktive. Historia e tij është shpërndarë gjerësisht në rrjetet sociale dhe ka prekur zemrat e mijëra njerëzve.
