Kancelari gjerman Friedrich Merz njoftoi të mërkurën gjatë vizitës së Presidentit ukrainas Volodymyr Zelensky se Berlini do të ndihmojë Ukrainën të zhvillojë armë të reja me rreze të gjatë që mund të godasin objektiva brenda territorit rus.
“Ministrat tanë të mbrojtjes do të nënshkruajnë sot një memorandum mirëkuptimi për prokurimin e sistemeve ukrainase të armëve me rreze të gjatë,” tha Merz pa zbuluar emrat e prodhuesve të përfshirë.
“Këto armë nuk do të kenë kufizime rrezesh, duke i mundësuar Ukrainës mbrojtjen e plotë, madje edhe kundër objektivave ushtarake jashtë territorit të saj,” tha ai në një konferencë të përbashkët për shtyp.
Merz tha se prodhimi mund të bëhet në Ukrainë dhe në Gjermani, duke përshkruar këtë si “fillimin e një forme të re bashkëpunimi ushtarak-industrial me potencial të madh”.
Nga ana tjetër, Ministri i Jashtëm rus Sergei Lavrov e cilësoi rritjen e shpenzimeve ushtarake nga Gjermania si “shumë shqetësuese”, duke kujtuar konfliktet e shekullit të 20-të.
