Pas një procesi të kujdesshëm restaurimi, Kalaja e Bashtovës, një nga monumentet më të veçanta të trashëgimisë kulturore shqiptare, i është rikthyer publikut.
E ndërtuar në shekullin XV, kjo kala ka pasur një rol strategjik në lidhjen e Shqipërisë me Mesdheun, duke shërbyer dikur si portë e rëndësishme e venecianëve për shkëmbime tregtare dhe komunikime ndërkulturore mes Lindjes dhe Perëndimit. Sot, ajo vjen e restauruar me mbështetjen e Bashkimit Europian, përmes programit EU4Culture, duke marrë një jetë të re jo vetëm si monument historik, por edhe si qendër aktive për kulturën, artin dhe turizmin.
Për herë të parë, Kalaja e Bashtovës është pajisur me një qendër moderne vizitorësh, e cila ofron informacion, shërbime bashkëkohore dhe hapësira për aktivitete kulturore, edukative dhe turistike. Falë këtyre ndërhyrjeve, vizita në Bashtovë do të kthehet në një përvojë të plotë për turistët vendas dhe të huaj.
Rijetësimi i kalasë pritet të ketë ndikim të drejtpërdrejtë në zhvillimin e zonës, duke nxitur turizmin kulturor e natyror, si dhe duke gjallëruar artizanatin, gastronominë tradicionale dhe mikpritjen lokale. Vetëm këtë vit, numri i vizitorëve në kalatë shqiptare është rritur ndjeshëm, duke treguar potencialin e madh që mbart kjo trashëgimi për ekonominë dhe identitetin kombëtar.
Kalaja e Bashtovës, me hapësirat e saj të mëdha, do të shndërrohet në një qendër multifunksionale ku do të organizohen koncerte, festivale, ekspozita, shfaqje teatrale dhe aktivitete për fëmijë e të rinj, duke e kthyer atë në një pikë referimi për turizmin kulturor në Shqipëri dhe rajon.
