Kryetari i KQZ, Ilirjan Celibashi ka deklaruar se vlera e kontraktimit mes KQZ-së dhe operatorit të shërbimit postar për votën e diasporës është 9,2 milionë euro.
Në një bashkëbisedim me gazetarët, Celibashi u shpreh se është përzgjedhur edhe operatori që do të kryejë transportin e fletës së votimit, ndërsa shtoi se kostoja për një fletë votimi shkon në 37,52 euro, kosto që mbulohet nga buxheti i shtetit.
“Për procesin e votimit nga jashtë, tashmë kemi të përcaktuar edhe operatorin e shërbimit postar. Do të jetë kompania DHL e cila do të kryejë shërbimin e dërgimit të fletëve të votimit te votuesit dhe kthimin mbrapsht në KQZ. Votuesit nuk do të paguajnë për këtë shërbim, koston e paguan buxheti i shtetit, ndërsa vlera e kontraktimit me këtë operator është 9,2 milionë euro me një çmim mesatar për dërgesë vajtje-ardhje prej 37,52 euro”, tha ai.
Kryekomisionieri Celibashi pohoi se sot pritet që të formalizohet një kontratë ndërmjet KQZ-së dhe këtij operatori, ndërsa theksoi se ka filluar tashmë procesi i printimit të fletëve të votimit për votuesit nga jashtë vendit.
“Nga komunikimi që kemi me kompaninë sllovene që po prodhon fletët e votimit si brenda dhe jashtë vendit, kemi filluar me printimin e fletëve për jashtë vendit”, nënvizoi ai.
“Rreth datave 7-8 prill do t’i kemi këtu fletët e votimit për votimin nga jashtë, ndërsa në 8-9-10 do të fillojmë përgatitjen e zarfeve dhe gjithë dokumentacionin për votuesit jashtë vendit duke shpresuar që ky proces të realizohet brenda datës 15 ose 17 prill në afatin maksimal. Më pas, do të ketë kohë e mjaftueshme për t’i sjellë në KQZ deri në orën 19:00 të datës 11 maj”, tha Celibashi. /j.p/r.e/
