Ish- Presidenti i 46-të i Shteteve të Bashkuara, Joe Biden, është diagnostikuar me një formë agresive të kancerit të prostatës, që është përhapur në kocka. Lajmi u konfirmua nga zyrtarë pranë tij më 18 maj 2025, pas analizave të detajuara që zbuluan një rezultat Gleason prej 9 – një tregues për një kancer me rritje të shpejtë dhe rrezik të lartë.
Ndërsa Biden dhe familja e tij po shqyrtojnë opsionet e trajtimit, liderë politikë nga të gjitha anët e spektrit politik kanë shprehur mbështetjen e tyre.
Presidenti aktual, Donald Trump, reagoi në platformën Truth Social të dielën pasdite duke shkruar:
“Melania dhe unë jemi të trishtuar kur morëm vesh për diagnozën e fundit mjekësore të Joe Biden. I dërgojmë urimet më të ngrohta Jill-it dhe familjes, dhe i urojmë Joe-s një shërim të shpejtë dhe të suksesshëm.”
Edhe ish-nënpresidentja Kamala Harris reagoi në platformën X (ish-Twitter):
“Joe është një luftëtar – dhe e di që do ta përballojë këtë sfidë me të njëjtën forcë, rezistencë dhe optimizëm që kanë karakterizuar gjithmonë jetën dhe lidershipin e tij.”
Bashkëshorti i saj, Doug Emhoff, ish-dyti i vendit gjatë administratës Biden, shprehu gjithashtu përkrahjen përmes një postimi të veçantë.
Diagnoza vjen në një moment të ndjeshëm për Biden, i cili prej largimit nga detyra ishte tërhequr nga jeta publike. Megjithatë, ndikimi i tij në politikë dhe përkushtimi për çështjet shëndetësore, veçanërisht kërkimet për kancerin, kanë mbetur të forta – të nxitura edhe nga humbja e djalit të tij, Beau Biden, nga kanceri në vitin 2015.
