TOKIO – Një tërmet i fuqishëm me magnitudë 7.6 ka goditur të hënën brigjet verilindore të Japonisë, duke nxitur autoritetet të lëshojnë urdhra evakuimi dhe paralajmërime për cunami përgjatë disa zonave bregdetare.
Sipas Agjencisë Meteorologjike të Japonisë (JMA), valë cunami deri në 3 metra mund të godasin zona si Iwate, Aomori dhe pjesë të Hokkaidos. Deri tani janë regjistruar valë rreth 40 centimetra në Aomori dhe Hokkaido, ndërsa monitorimi po vijon.
Shërbimi Gjeologjik i SHBA (USGS) njoftoi se tërmeti ndodhi rreth orës 23:15 me orën lokale, afro 70 km larg bregdetit, në një thellësi rreth 33 km. Lëkundje të forta u ndjenë edhe në Tokio për mbi 30 sekonda.
Sekretari i Përgjithshëm i Kabinetit, Minoru Kihara, u bëri thirrje banorëve të zonave të prekura të evakuohen drejt terreneve më të larta ose ndërtesave të sigurta, përfshirë qendrat e emergjencës.
Autoritetet konfirmuan se nuk ka raportime për parregullsi në centralet bërthamore Higashidōri dhe Onagawa, ndërsa objektet e tjera bërthamore po kontrollohen si masë paraprake.
Kryeministrja e re e Japonisë, Sanae Takaichi, deklaroi se qeveria po bashkëpunon ngushtë me autoritetet lokale për vlerësimin e dëmeve dhe zbatimin e masave emergjente. “Do të veprojmë me një zë, duke vendosur jetën e njerëzve mbi gjithçka tjetër,” theksoi ajo.
Japonia ndodhet në “Unazën e Zjarrit” të Paqësorit, një nga zonat më aktive sizmikisht në botë. Kujtesa kolektive mbetet ende e fortë nga tërmeti shkatërrues i vitit 2011 me magnitudë 9.1, i cili shkaktoi cunami dhe katastrofë bërthamore.
Ngjarja mbetet në zhvillim dhe autoritetet paralajmërojnë qytetarët të ndjekin udhëzimet zyrtare.
