Ushtria izraelite ka pranuar se ushtarët e saj kanë bërë një gabim tragjik në një incident të ndodhur më 23 mars në jug të Gazës, ku 15 punonjës të emergjencës u vranë gjatë një sulmi ajror pranë qytetit Rafah. Të vrarët ishin pjesë e një kolone të përbërë nga autoambulanca të Shoqërisë së Gjysmëhënës së Kuqe Palestinëse (PRCS), një automjet i Kombeve të Bashkuara dhe një zjarrfikëse e Mbrojtjes Civile të Gazës.
Fillimisht, ushtria izraelite pretendoi se autokolona ishte parë si e dyshimtë, pasi thuhej se automjetet po lëviznin natën në errësirë, pa drita apo sinjale paralajmëruese, dhe nuk kishin qenë të koordinuara më parë me ushtrinë. Kjo, sipas tyre, kishte ngritur dyshime te trupat në terren, të cilët më pas hapën zjarr.
Megjithatë, një video e gjetur në telefonin e një prej paramedikëve që u vra në incident, tregon një pamje ndryshe nga pretendimet zyrtare. Në pamjet filmike, duket qartë se automjetet e emergjencës kishin ndezur dritat dhe po udhëtonin për të përgjigjur një thirrjeje për të ndihmuar të plagosurit në një zonë të bombarduar.
Ushtria izraelite, përballë fakteve të reja dhe presionit ndërkombëtar, ka pranuar gabimin dhe ka deklaruar se po zhvillon një hetim të brendshëm mbi rrethanat e këtij sulmi. Megjithatë, ata kanë përmendur se disa nga viktimat mund të kenë pasur lidhje me Hamasin – pretendim që nuk është konfirmuar në mënyrë të pavarur.
Ngjarja ka shkaktuar zemërim dhe tronditje në mbarë botën, duke ngritur pyetje serioze për sigurinë e punonjësve të ndihmës humanitare në zona konflikti dhe për respektimin e të drejtës ndërkombëtare humanitare.
