Një sulm ajror izraelit në kampin e refugjatëve Al-Nuseirat në qendër të Gazës ka shkaktuar vdekjen e 10 personave, përfshirë gjashtë fëmijë, ndërsa qëndronin në radhë për të mbushur ujë, sipas zyrtarëve të emergjencës palestinezë.
Të plagosurit, përfshirë shtatë fëmijë, janë dërguar në spitalin Al-Awda në Nuseirat. Pamje të verifikuara nga vendngjarja tregojnë njerëz që vrapojnë për të ndihmuar të plagosurit, ndërsa mes bidonëve të verdhë shihen trupat e vegjël të fëmijëve.
Izraeli pranon gabimin: “Municioni ra dhjetëra metra larg objektivit”
Ushtria izraelite (IDF) pranoi se gjatë një sulmi që synonte një anëtar të grupit Xhihadi Islamik, ka ndodhur një “gabim teknik” dhe raketa përfundoi larg objektivit të planifikuar. Sipas tyre, incidenti është në shqyrtim dhe IDF “shpreh keqardhje për çdo dëm ndaj civilëve të pafajshëm”.
Rritje e ndjeshme e viktimave në Gaza
Sipas autoriteteve të mbrojtjes civile në Gaza, të paktën edhe 19 palestinezë të tjerë humbën jetën të dielën në tre sulme të tjera në ndërtesa banimi në Gaza City dhe në qendër të territorit.
Komiteti Ndërkombëtar i Kryqit të Kuq (ICRC) raportoi se ka trajtuar më shumë raste të viktimave masive në spitalin fushor në Rafah gjatë gjashtë javëve të fundit sesa gjatë gjithë vitit të kaluar. Vetëm të shtunën, 132 persona të plagosur nga armët u sollën në spital, prej të cilëve 31 ndërruan jetë.
UN: Spitalet po shuhen, sistemi shëndetësor në kolaps
Organizatat e OKB-së paralajmëruan se mungesa e karburantit në Gaza ka arritur nivele kritike. Nëse rezervat mbarojnë, spitalet, sistemet e ujësjellësit, rrjetet e kanalizimeve dhe furrat do të ndalojnë së funksionuari.
“Hemratrit, njësitë e terapisë intensive dhe të lindjes janë jashtë funksionit. Ambulancat nuk lëvizin më,” – njoftoi OKB.
Akuzat për viktima pranë qendrave të ndihmës
Një tjetër incident tragjik ndodhi të shtunën pranë një pike ndihmash në jug të Gazës, ku 24 persona u vranë. Dëshmitarët thanë se ushtarë izraelitë qëlluan mbi turmën që po përpiqej të siguronte ushqim. IDF mohoi të ketë lënduar ndonjë person aty, ndërsa një zyrtar i saj tha se janë qëlluar vetëm “të shtëna paralajmëruese”.
Zyra e OKB për të Drejtat e Njeriut thotë se deri tani ka regjistruar 789 viktima pranë pikave të ndihmës që nga hapja e tyre më 27 maj. Shumica janë shënuar afër zonave të kontrolluara nga Fondacioni Humanitar i Gazës (GHF), i mbështetur nga SHBA dhe Izraeli.
GHF e ka quajtur “të rreme dhe të manipuluara” statistikat e OKB, duke pretenduar se viktimat nuk mund të lidhen drejtpërdrejt me praninë e qendrave të ndihmës që menaxhon.
Bilanci tragjik: Mbi 57 mijë të vrarë në Gaza që nga tetori
Fushata ushtarake e Izraelit nisi pas sulmit të Hamasit më 7 tetor 2023, ku humbën jetën rreth 1,200 persona dhe mbi 250 të tjerë u morën peng.
Që atëherë, sipas Ministrisë së Shëndetësisë të kontrolluar nga Hamasi, janë vrarë të paktën 57,882 persona në Gaza. Pjesa dërrmuese e popullsisë është zhvendosur disa herë, ndërsa mbi 90% e banesave janë shkatërruar ose dëmtuar.
