Konflikti mes Izraelit, SHBA-së dhe Iranit po përshkallëzohet ndjeshëm, teksa Izraeli ka nisur një valë të re sulmesh ajrore ndaj objektivave që i cilëson “ushtarake” në Teheran dhe Bejrut.
Sipas ushtrisë izraelite (IDF), sulmet synojnë qendra komanduese dhe depo armësh, ndërsa ministri i Mbrojtjes i Izraelit ka deklaruar se trupat tokësore do të “avancojnë dhe do të marrin zona të tjera strategjike në Liban” për të parandaluar sulmet ndaj komuniteteve në veri të Izraelit.
Izraeli ka deklaruar gjithashtu se trupat tokësore do të “avancojnë dhe do të marrin zona të tjera strategjike në Liban”, me qëllim parandalimin e sulmeve ndaj komuniteteve izraelite pranë kufirit verior.
Sipas autoriteteve izraelite, operacioni synon neutralizimin e pozicioneve nga ku, sipas tyre, po kryhen sulme drejt territorit të Izraelit.
Ndërkohë, Ministria e Mbrojtjes e Arabisë Saudite ka bërë të ditur se ambasada amerikane në Riad është goditur nga dy dronë, që dyshohet të jenë lëshuar nga Irani. Sipas autoriteteve saudite, sulmi ka shkaktuar një zjarr të kufizuar dhe dëme të vogla materiale.
Media shtetërore iraniane raportojnë gjithashtu se një ndërtesë komanduese në një bazë ajrore amerikane në Bahrein është shkatërruar nga sulmet me raketa dhe dronë, por SHBA-ja nuk ka konfirmuar zyrtarisht këto pretendime.
Sekretari amerikan i Shtetit, Marco Rubio, ka paralajmëruar se “goditjet më të forta janë ende përpara”, ndërsa presidenti Donald Trump e ka cilësuar ndërhyrjen si “shansi i fundit dhe më i mirë” për të ndalur atë që e quan “regjim i rrezikshëm” në Teheran.
Nga ana tjetër, Irani ka paralajmëruar se mund të bllokojë ngushticën e Hormuzit, një nga rrugët më të rëndësishme të furnizimit global me energji. Tregjet ndërkombëtare kanë reaguar menjëherë, me rritje të çmimit të naftës dhe gazit, ndërsa kompanitë energjetike në rajon raportojnë ndërprerje prodhimi për shkak të sulmeve.
Situata mbetet tepër e tensionuar, me sirena alarmi në Tel Aviv, shpërthime të raportuara në Teheran dhe re të dendura tymi mbi Bejrut. Analistët paralajmërojnë se përshkallëzimi aktual mund të ketë pasoja të gjera rajonale dhe globale.
