Situata në Lindjen e Mesme po përshkallëzohet me shpejtësi të frikshme. Izraeli ka ndërmarrë një sulm ndaj një prej komplekseve më të mëdha petrokimike të Iranit, në Asaluyeh – një zonë që prodhon një pjesë të madhe të industrisë energjetike të vendit.
Sulmi vjen vetëm pak orë pasi Donald Trump kërcënoi publikisht Iranin me shkatërrim të infrastrukturës, nëse nuk hapet Ngushtica e Hormuzit.
Në deklaratat e tij, Trump paralajmëroi se Irani mund të përballet me goditje ndaj centraleve elektrike dhe urave, duke e quajtur të martën si një ditë “shkatërrimi total”.
Ndërkohë, Irani pretendon se shefi i inteligjencës së Gardës Revolucionare është vrarë në një sulm të përbashkët SHBA-Izrael, çka rrit edhe më shumë tensionet.
Sulme dhe shpërthime janë raportuar në disa zona të rajonit, ndërsa edhe në Liban situata mbetet e tensionuar, me viktima nga goditjet ajrore.
Diplomacia duket në fazat e fundit, ndërsa përpjekjet për armëpushim janë ende të paqarta dhe pa një vendim final nga Shtëpia e Bardhë.
Ngushtica e Hormuzit mbetet pika më kritike e përplasjes, pasi përmes saj kalon një pjesë e madhe e naftës botërore.
Bota po mban frymën, ndërsa rreziku i një përshkallëzimi edhe më të madh është më pranë se kurrë.
