Autoritetet italiane kanë goditur një nga rrjetet më të fuqishme shqiptare të trafikut ndërkombëtar të drogës, duke çmontuar organizatën e njohur si grupi i “Troplinëve”. Mediat italiane raportojnë se hetimi, i zhvilluar nga viti 2020 deri në 2025 nga Njësia e Policisë Ekonomiko–Financiare e Breshias dhe Shërbimi Qendror i Hetimit të Kriminalitetit të Organizuar, ka zbuluar një strukturë të mirëorganizuar që trafikonte kokainë nga Ekuadori drejt Europës dhe Italisë, ndërsa paratë pastroheshin në Shqipëri.
Në krye të grupit rezultojnë Denis Myftiu, Erion Kapidani dhe Elvis Doçi, i njohur si Visi i Pojës dhe nip i Xhevdet Troplinit. Të tre drejtonin veprimtarinë kriminale nga baza operative në Shqipëri, duke përdorur platforma të enkriptuara komunikimi si Sky-ECC dhe Encrochat. Sipas mediave italiane, hetuesit arritën t’i deshifrojnë këto komunikime me ndihmën e partnerëve ndërkombëtarë. Elvis Doçi, i cili prej kohësh është në kërkim nga SPAK për operacionin “Ura”, vijon të jetë i pakapshëm.
Operacioni i quajtur “Golden River”, i koordinuar nga Prokuroria Antimafia e Breshias, ka çmontuar një rrjet që dyshohet se ka trafikuar mbi 1300 kilogramë kokainë dhe heroinë gjatë një periudhe pesëvjeçare. Hetimi konsiderohet një ndër goditjet më të forta ndaj trafikut ndërkombëtar të drogës në Itali. Gjykata e Breshias ka lëshuar 24 masa sigurie, prej të cilave 21 arrest me burg dhe 3 arrest shtëpie.
Sipas dokumenteve hetimore, Denis Myftiu, i njohur edhe me aliaset Aurel Hoxha apo Dario Myftiu, ishte promotori dhe drejtuesi kryesor i rrjetit, duke mbajtur kontaktet me furnizuesit e kokainës në Amerikën e Jugut. Nga Durrësi, Myftiu dhe Kapidani koordinonin të gjithë zinxhirin e trafikut. Kapidani fillimisht vepronte nga Bergamo, duke menaxhuar pritjen dhe shpërndarjen e drogës, ndërsa pas dhjetorit 2021 u zhvendos përfundimisht në Shqipëri, ku e drejtonte trafikun së bashku me Myftiun.
Droga nga Ekuadori transportohej drejt Italisë me kamionë, ndërsa heroina vinte nga Shqipëria me autobusë të linjës. Shoferët e autobusëve shpesh nuk ishin në dijeni, ndërsa ata të kamionëve bashkëpunonin me klanet kriminale. Paratë “cash” të përfituara nga shitjet dërgoheshin në Shqipëri përmes korrierëve, kryesisht shoferë autobusi që i transportonin gjatë udhëtimeve të rregullta Itali–Shqipëri. Një kompani transporti e drejtuar nga shtetasi italian Giuseppe Iorio siguronte mbështetje logjistike për zhvendosjen e drogës me mjete të rënda.
Hetimet zbuluan gjashtë baza logjistike në territorin italian: tre në provincën e Breshias, një në Lecco, një në Pulja dhe një në veri të vendit. Në këto qendra bëhej magazinimi i drogës së ardhur nga Amerika e Jugut dhe shpërndarja te klientët. Nga interceptimet rezulton se baza e Leccos, e drejtuar nga Ardian Deliu, shpërndante rreth 80 kilogramë kokainë në pak më shumë se një muaj. Deliu ishte përgjegjës për dhjetëra episode shpërndarjeje në Padova, Torino, Pordenone, Bergamo dhe qytete të tjera, derisa u arrestua në janar 2021 me pesë kilogramë kokainë të fshehur në një furgon.
Hetimet dokumentojnë edhe rolin e Ervis Belshakut, banues në Valmadrera, i cili akuzohet për shpërndarjen e tre kilogramëve kokainë dhe mbajtjen e 23 kilogramëve të tjerë në Calusco d’Adda, në provincën e Bergamos, mes dhjetorit 2020 dhe janarit 2021.
Operacioni “Golden River” ka nxjerrë në dritë edhe lidhjet e ngushta të organizatës shqiptare me klanin mafioz Sacra Corona Unita në Pulja, që ndihmonte në shpërndarjen e drogës në jug të Italisë. Sipas autoriteteve, rrjeti kishte arritur të krijonte një skemë të konsoliduar, të mbështetur në logjistikë, transport dhe bashkëpunime ndërkombëtare, duke e bërë atë një nga strukturat më të fuqishme të trafikut të kokainës në Europë.
