Administrata e presidentit Donald Trump ka vënë në zbatim një regjim të ri tarifor për importet, i cili prek edhe Shqipërinë dhe Kosovën. Sipas masave të reja, të gjitha eksportet shqiptare dhe kosovare drejt Shteteve të Bashkuara do të taksohen me një tarifë prej 10%.
Sipas të dhënave zyrtare, gjatë vitit 2024 Shqipëria eksportoi drejt SHBA-së mallra me vlerë 7 miliardë lekë. Produktet kryesore të eksportuara përfshijnë minerale, lëndë djegëse dhe naftë, bimë medicinale, si dhe produkte të industrisë së tekstilit dhe këpucëve. Ndërkohë, Shqipëria importoi nga SHBA mallra me vlerë 20.5 miliardë lekë, ku përfshihen ushqime, makineri, pajisje dhe automjete.
Ekspertët e ekonomisë paralajmërojnë se ndryshimi i politikave tregtare të SHBA mund të ketë ndikime të drejtpërdrejta dhe të tërthorta mbi ekonominë shqiptare. “Politika tarifore e administratës Trump, përtej ndikimit të drejtpërdrejtë, pritet të prekë Shqipërinë edhe në mënyrë indirekte përmes partnerëve të saj kryesorë tregtarë,” thonë ekspertët.
Një tjetër masë tarifore që pritet të ndikojë në ekonominë shqiptare është vendosja e një tarife prej 20% për importet nga vendet e Bashkimit Europian në SHBA. Duke qenë se 58.9% e tregtisë së jashtme të Shqipërisë realizohet me vendet e BE-së, kjo masë mund të krijojë efekte zinxhir në disa sektorë, duke sjellë rritje të mëtejshme të çmimeve dhe ndryshime në orientimin e tregjeve.
Sipas vendimit të administratës amerikane, Shqipëria, Kosova dhe Mali i Zi do të përballen me një tarifë bazë prej 10%, ndërsa për vendet e tjera të Ballkanit Perëndimor, si Maqedonia e Veriut, Bosnje-Hercegovina dhe Serbia, tarifat do të jenë më të larta, duke varijuar nga 33% në 37%.
Ekspertët sugjerojnë që sipërmarrjet shqiptare të shohin mundësi të reja tregtare për të zbutur ndikimin e këtyre tarifave, duke eksploruar tregje alternative dhe duke rritur konkurrueshmërinë e produkteve të tyre në nivel ndërkombëtar.
