Një klasë ilaçesh të quajtur beta-bllokues — të përdorur për dekada si trajtim i parë pas një ataku kardiak — nuk sjellin përfitime për pjesën më të madhe të pacientëve dhe madje mund të rrisin rrezikun e shtrimit në spital dhe vdekjes te disa gra, por jo te burrat, sipas një kërkimi të ri.
“Këto gjetje do të ndryshojnë të gjitha udhëzimet ndërkombëtare për përdorimin e beta-bllokuesve te burrat dhe gratë, dhe duhet të nxisin një qasje të re, të ndarë sipas gjinisë, në trajtimin e sëmundjeve kardiovaskulare,” tha autori kryesor i studimit, Dr. Valentin Fuster, president i Spitalit të Zemrës Mount Sinai Fuster në New York dhe drejtor i përgjithshëm i Qendrës Kombëtare të Kërkimeve Kardiovaskulare në Madrid.
Studimi tregoi se gratë me dëme të vogla në zemër pas infarktit, të cilave u jepej trajtim me beta-bllokues, kishin shumë më tepër gjasa të pësonin një tjetër atak kardiak ose të shtroheshin në spital për insuficiencë kardiake – dhe gati tre herë më shumë gjasa të vdisnin – krahasuar me ato që nuk e morën ilaçin. Efekti ishte edhe më i theksuar te gratë që merrnin doza të larta.
Ky përfundim u botua në European Heart Journal dhe u prezantua gjithashtu në Kongresin e Shoqatës Evropiane të Kardiologjisë në Madrid.
Megjithatë, efektet negative u vunë re vetëm te gratë me fraksion ejeksioni të ventrikulit të majtë mbi 50%, që konsiderohet funksion normal i zemrës. Për pacientët me fraksion nën 40%, beta-bllokuesit mbeten trajtimi standard, pasi ulin rrezikun e aritmive që mund të shkaktojnë një atak të dytë.
Sipas ekspertëve, ilaçet mund të shkaktojnë edhe efekte anësore si: tension i ulët, rrahje të ngadalta të zemrës, probleme me funksionin seksual, lodhje dhe ndryshime humori.
Shkencëtarët theksojnë se gratë mund të jenë më të ndjeshme ndaj këtyre barnave për shkak të madhësisë më të vogël të zemrës dhe faktorëve të tjerë biologjikë, që ende nuk kuptohen plotësisht.
Historikisht, kërkimet mbi sëmundjet e zemrës janë përqendruar më shumë te burrat, çka ka bërë që diagnoza dhe trajtimi te gratë të vonohen ose të jenë të pasakta. Simptomat e infarktit shpesh paraqiten ndryshe: burrat zakonisht përjetojnë dhimbje gjoksi, ndërsa gratë kanë më shpesh shenja më jo-tipike si dhimbje shpine, tretje të rënduar apo vështirësi në frymëmarrje.
Studimi i ri është pjesë e provës klinike të quajtur REBOOT, që përfshiu 8,505 pacientë të trajtuar për infarkt në 109 spitale në Spanjë dhe Itali gjatë pothuajse katër viteve. Rezultatet u botuan edhe në The New England Journal of Medicine.
Përfundimi ishte i qartë: nuk u gjet asnjë përfitim nga përdorimi i beta-bllokuesve te pacientët me funksion normal të zemrës ( mbi 50%), pavarësisht se kanë qenë trajtimi standard për rreth 40 vjet.
Ndërkohë, një analizë tjetër me 1,885 pacientë, e botuar në The Lancet, tregoi se ata me fraksion mes 40% dhe 50% përfituan nga beta-bllokuesit, me një ulje rreth 25% të rrezikut për infarkt të ri, insuficiencë kardiake dhe vdekje nga çdo shkak./CNN
