Një ngjarje e rëndë tronditi qytetin e Vushtrrisë mbrëmjen e së dielës, ku një 19-vjeçar humbi jetën si pasojë e të shtënave me armë zjarri rreth orës 20:35.
I dyshuari për këtë krim ka pranuar fajësinë gjatë marrjes së deklaratës nga autoritetet. Lajmin e konfirmoi zëdhënësi i Prokurorisë Themelore në Mitrovicë, Valon Preteni, i cili sqaroi se i dyshuari aktualisht ndodhet në ndalim 48 orësh me vendim të prokurorit.
“Është arrestuar një person i dyshuar për veprën penale ‘Vrasje e rëndë’ dhe ndaj tij është lëshuar masa e ndalimit 48-orësh. Arma e përdorur në këtë krim është sekuestruar, ndërkohë që prokuroria dhe policia po mbledhin provat relevante për zbardhjen e plotë të rastit. Gjatë marrjes në pyetje, i pandehuri ka pranuar fajësinë për vrasjen”, ka deklaruar Preteni.
Arrestimi dhe sekuestrimi i armëve
Sipas Policisë së Kosovës, i dyshuari me inicialet B.D është arrestuar menjëherë pas ngjarjes. Gjatë kontrollit, autoritetet i kanë konfiskuar një pistoletë, që dyshohet se është arma e krimit.
Ndërkohë, gjatë bastisjes në banesën e tij, policia ka sekuestruar edhe një armë të gjatë me pesë fishekë, e cila do të ekzaminohet për të parë nëse është e lidhur me ndonjë veprimtari tjetër kriminale.
Zëdhënësi i Policisë për rajonin e Mitrovicës, Avni Zahiti, ka konfirmuar se viktima, 19-vjeçari me inicialet A.Z, u dërgua me urgjencë në Spitalin e Vushtrrisë, por fatkeqësisht mjekët konstatuan se ai kishte ndërruar jetë. “Trupi i pajetë i viktimës është dërguar për autopsi në Institutin e Mjekësisë Ligjore (IML) me urdhër të prokurorit”, ka deklaruar Zahiti.
Prokuroria kërkon paraburgim
Autoritetet po vazhdojnë hetimet për të siguruar të gjitha provat dhe dëshmitë e nevojshme. Ndërkohë, brenda afateve ligjore, Prokuroria pritet të paraqesë kërkesë për caktimin e masës së paraburgimit për të dyshuarin.
Ngjarja ka tronditur komunitetin e Vushtrrisë, ndërsa hetimet pritet të hedhin më shumë dritë mbi rrethanat dhe motivet e këtij krimi të rëndë.
