Ministri i Shtetit për Marrëdhëniet me Parlamentin, Taulant Balla, njëherësh Drejtues Politik i Partisë Socialiste për Diasporën, ngushëlloi familjen e sportistes Anila Muçaj, e cila humbi jetën ndërsa stërvitej në jugperëndim të Irlandës.
“Një lajm i trishtë vjen për botën e sportit shqiptar! Atletja shqiptare e maratonave Anila Muçaj është ndarë nga jeta në Tralee të Irlandës. Shqiptarja jonë e diasporës, nënë e dy fëmijëve, u aksidentua nga një makinë në kohën kur së bashku me dy sportiste të tjera ishin duke u stërvitur. Ngushëllime familjes! U prehsh në paqe, Anila!” shkruan Balla në ngushëllimin e tij në rrjete sociale.
48-vjeçarja, me origjinë nga Tepelena, nënë e dy fëmijëve, u përplas nga një makinë ndërsa ishte duke u stërvitur në një rrugë të njohur për vrapim dhe çiklizëm në Tralee të Irlandës.
Sipas mediave irlandeze, drejtuesi i mjetit, një 80-vjeçar që kishte shfaqur probleme shëndetësore, humbi kontrollin e automjetit, duke shkaktuar aksidentin fatal.
Anila Muçaj nuk mundi t’i mbijetonte plagëve. Dy mikeshat e saj, të cilat ishin bashkë me të, kanë pësuar lëndime, por janë jashtë rrezikut për jetën. Po ashtu, edhe drejtuesi i mjetit ndodhet në spital në gjendje të stabilizuar.
Anila njihej si një atlete e përkushtuar dhe kishte marrë pjesë në disa maratona ndërkombëtare.
