Gazeta prestigjioze amerikane The Washington Post ka njoftuar pushimin nga puna të rreth një të tretës së stafit, duke reduktuar ndjeshëm mbulimin e sportit, lajmeve lokale dhe raportimeve nga jashtë vendit. Vendimi u bë publik të mërkurën dhe prek disa departamente kyçe të redaksisë, në atë që konsiderohet një nga momentet më të vështira për median në pronësi të miliarderit Jeff Bezos, themeluesit të Amazon.
Kryeredaktori Matt Murray e cilësoi vendimin si një hap të dhimbshëm, por të domosdoshëm për të sjellë “stabilitet” dhe për të riformatuar modelin e biznesit në një kohë kur trafiku online ka rënë ndjeshëm gjatë tre viteve të fundit, pjesërisht për shkak të bumit të inteligjencës artificiale. Megjithatë, njoftimi u prit me reagime të forta nga gazetarët dhe ish-drejtuesit e gazetës, të cilët e përshkruan situatën si ndër “ditët më të errëta” në historinë e saj.
Sindikatat paralajmëruan se shkurtimet rrezikojnë të dobësojnë misionin e gazetës dhe të largojnë lexuesit, ndërsa disa korrespondentë raportuan se u pushuan edhe në zona lufte apo rajone të nxehta si Lindja e Mesme. Kriza financiare e medias është thelluar edhe pas humbjes së dhjetëra mijëra abonentëve, pasi gazeta vendosi të mos mbështesë asnjë kandidat në zgjedhjet presidenciale të vitit 2024, duke thyer një traditë disa dekadash. Ndërkohë, situata e Post bie në kontrast me rivalin The New York Times, i cili shtoi rreth 450 mijë abonentë digjitalë vetëm në tremujorin e fundit të vitit 2025.
