Në një rrëfim që do ta bënte edhe Netflix-i xheloz, Sekretari i Përgjithshëm i PD-së, Flamur Noka, ka hedhur dritë mbi një teori të re zgjedhore që përfshin GPS, zarfe që nuk kalojnë dot kufirin, vota me pasaportë angleze dhe një “James Bond” që fshihet në Selanik.
Në një emision prime-time, Noka deklaroi me seriozitet të çeliktë:
“Zarfe me vota nga Londra janë dërguar me GPS dhe… nuk kanë ardhur kurrë në Shqipëri!”
Duket se nuk është vetëm posta që ka vonesa, por edhe satelitët.
Ai shtoi se në Selanik janë futur të paktën 500 GPS brenda zarfeve. Sipas burimeve tona (imagjinare), një nga zarfat është kapur nga radarët e NATO-s, duke devijuar në drejtim të Antarktidës.
Nga ana tjetër, në një tjetër univers paralel, Sali Berisha deklaroi se në Greqi një njeri i vetëm ka plotësuar 30 mijë vota. Ky super-njeri, sipas gojëdhënave, pi 7 kafe turke në mëngjes dhe plotëson 1,250 fletë votimi para drekës, ndërsa pasdite mban kontakt direkt me PS-në për të sinkronizuar votat sipas horoskopit.
Burime jozyrtare thanë se ky person është një kombinim mes patronazhistit ideal dhe printerit HP.
Përmbledhje shkencore:
Zarfa me çip GPS që kalojnë kufijtë më rrallë se avionët e Rinasit.
Votues të PD-së në Londër që kanë votuar në grup, në seri dhe ndoshta edhe në Morse.
Një votues në Greqi që është shpallur “Punonjësi i Muajit” për arritjet e tij në votim industrial.
Në mungesë të kamerave të sigurisë, ndoshta na mbetet të presim një serial dokumentar:
“Zarfe që nuk u kthyen kurrë” – Narrator Morgan Freeman, me regji nga Alfred Hitchcock (nëse ringjallet).
Deri atëherë, mbani GPS-in gati. Nëse shihni ndonjë zarf që endet rrugëve të Londrës, lutemi lajmëroni autoritetet… ose Netflix-in.
