Gjatë homazheve për artistin e ndjerë Naun Shundi, vajza e tij ndau një mesazh të thellë dhe prekës për jetën, trashëgiminë dhe dhimbjen që la pas largimi i parakohshëm i të atit.
Me zërin që i dridhej nga emocionet, ajo kujtoi momentet e fundit të jetës së të atit, i cili u përball me sëmundjen në heshtje, pa mundur të thoshte fjalët e fundit.
“Edhe pse iku, la diçka. Ajo që la është teatri ‘Zonja e Bujtinës’ dhe kushdo që të jetë në këtë vend, të shkojë dhe të bëjë diçka. Ai la jetën për atë teatër. Iku jeta pa thënë dot atë që duhej. Jam e sigurt që ka njerëz që nuk i thonë dot gjërat. Mjekët nuk na e thanë kurrë që babi do vdiste. Edhe ai mendoi se ndoshta do të jetonte. Iku dhe nuk foli dot një llaf,” – tha vajza e Shundit.
Ajo shtoi se teatri është për të gjithë, dhe fjalët e tij duhet të vazhdojnë të frymëzojnë artistët dhe publikun:
“Unë nuk jam aktore, jam vetëm vajza e tij. Kushdo të shkojë dhe të flasë, të thotë të vërtetën. Ai e thoshte dhe vdiq, e hëngri kanceri nga brenda. Ka lënë shumë njerëz që e duan dhe e dëgjojnë. Këta njerëz të vijnë dhe të thonë diçka, të vazhdojnë me të drejtën.”
Naun Shundi la pas një trashëgimi të çmuar artistike dhe një teatër që do të kujtohet për kontributin e tij të palodhur ndaj kulturës shqiptare.
