Një histori prekëse nga Afganistani ka bërë xhiron e rrjeteve sociale: një qenush është fotografuar duke u kthyer vazhdimisht mes rrënojave të fshatit të tij, aty ku dikur jetonte me familjen që e donte, sot e zhdukur nën masivët e betonit dhe gurëve të tërmetit shkatërrues të 31 gushtit 2025.
Pas tërmetit që goditi fshatin Ochky, në distriktin Gayam, duke shkaktuar mbi 1000 viktima dhe rreth 1500 të plagosur rëndë, asgjë nuk mbeti si më parë. Mes shtëpive të shkatërruara dhe jetëve të humbura, një qen i vogël vazhdon të kthehet në vendin ku dikur ishte shtëpia e tij, sikur të shpresonte se njerëzit e tij do të shfaqeshin sërish.
Qenushi nuk ka më as emër dhe as histori të dokumentuar. Gjithçka që kishte, u zhduk me tërmetin. Megjithatë, ai nuk e pranon humbjen dhe vazhdon të kërkojë mes rrënojave diçka të njohur, një aromë, një zë, një shenjë të familjes së tij.
Banorët e zonës, edhe vetë të goditur rëndë nga tragjedia, janë kujdesur për të. I japin ushqim, ujë dhe pak ngrohtësi njerëzore, duke u përpjekur t’i zëvendësojnë, sadopak, dashurinë që ka humbur. Sipas tyre, qenushi kthehet çdo ditë në të njëjtin vend, dëshmi e lidhjes së fortë që kishte me njerëzit e tij.
Historia e tij është bërë simbol i dhimbjes që lë pas një fatkeqësi natyrore, por edhe i besnikërisë së pafundme që kafshët tregojnë ndaj atyre që i kanë dashur.
