Himara ka hapur zyrtarisht sezonin turistik me një ngjarje unike: Agim Agushi ka vendosur një rekord të ri Guinness në qendër të qytetit bregdetar. Ai ka arritur të xhonglojë me kokë një top futbolli duke mbajtur veshur 14 bluza brenda një hapësire prej vetëm 1 m², duke rrëmbyer kështu rekordin e tij të 16-të botëror.
Performanca e veçantë tërhoqi vëmendjen e qytetarëve dhe turistëve, të cilët ishin të pranishëm në hapjen festive të sezonit. Kryetari i Bashkisë së Himarës u shpreh krenar që Agushi zgjodhi pikërisht Himarën për këtë arritje: “Është një fillim me këmbë të mbarë për turizmin tonë këtë vit,” tha ai.
Agim Agushi është një emër tashmë i njohur në botën e rekordeve Guinness, duke lënë pas edhe emra të njohur si polaku Dariusz Kolodziczyk në disiplinat e xhonglimit të lirë.
Ky rekord jo vetëm që sjell famë për sportistin, por edhe vendos Himarën në hartën e ngjarjeve ndërkombëtare, duke dhënë një sinjal pozitiv për sezonin turistik që sapo ka nisur.
