Hamas ka njoftuar se është i gatshëm të lirojë të gjithë pengjet izraelitë – të gjallë dhe të vdekur – si pjesë e planit të paqes të propozuar nga Presidenti amerikan Donald Trump për t’i dhënë fund luftës në Rripin e Gazës. Megjithatë, grupi palestinez kërkon ndryshime të rëndësishme në disa pika kyçe të planit.
Sipas mediave ndërkombëtare, Hamas ka paraqitur kundërpropozime që lidhen me tërheqjen e plotë të trupave izraelite, garancitë për rolin e tij politik në të ardhmen, si dhe kohën dhe mënyrën e çarmatimit. Burime brenda grupit kanë bërë të ditur se përgjigjja ndaj planit është “pozitive, por me kushte”.
Presidenti Trump ka vendosur një afat të fundit deri të dielën në orën 18:00 (me orën e Uashingtonit) që Hamas të pranojë planin në tërësi, në të kundërt ka paralajmëruar “pasoja ekstreme”.
Plani 20-pikësh amerikan parashikon ndërprerjen e ofensivës ushtarake, tërheqjen graduale të forcave izraelite, çarmatimin e Hamasit, si dhe krijimin e një administrate ndërkombëtare të përkohshme për menaxhimin e Gazës, përpara kalimit të kontrollit tek një autoritet palestinez të reformuar.
Kjo është hera e parë që Hamas sinjalizon publikisht një gatishmëri për marrëveshje të gjerë që përfshin lirimin e të gjithë pengjeve, ndërkohë që negociatat ndërmjetësuese po zhvillohen në mënyrë intensive përmes Egjiptit dhe Katarit.
