Një numër prej 28 arrestimesh u kryen nga Policia greke të mërkurën gjatë një operacioni të madh policor për anëtarët e një organizate nacionaliste në Selanik.
Sipas informacioneve, janë arrestuar 15 të rritur dhe 13 të mitur, të dyshuar si anëtarë të Rinisë Nacionaliste të Selanikut. Për më tepër, një i mitur që është identifikuar ndodhet jashtë vendit dhe është në kërkim. Midis të arrestuarve është edhe kreu i organizatës.
Të pandehurit dyshohet se janë të përfshirë në raste vjedhjesh, rrahjesh me karakteristika raciste, nxitjeje për akte dhune dhe akte të tjera, ndërsa – për momentin – është identifikuar përfshirja e tyre në rastet e viteve 2024 dhe 2025.
I njëjti informacion raporton se disa prej tyre janë të përfshirë në përplasjen që ndodhi gjatë marshimit për në Tempi, më 28 shkurt 2025, kur persona me flamuj grekë u përleshën me persona nga hapësira anarkiste jashtë Stacionit të Ri Hekurudhor të Selanikut.
Gjithashtu, ndër të tjera, ata janë të përfshirë në rastet e njerëzve që shkruajnë slogane nacionaliste-raciste në shkollat e Selanikut. Aktivitetet e organizatës duket se kanë filluar në vitin 2019, janë ndalur gjatë periudhës së koronavirusit dhe kanë rifilluar në vitin 2024.
Sipas informacioneve, 28 arrestimet u kryen nga Sigurimi i Shtetit mëngjesin e kësaj të mërkure në shtëpitë e të akuzuarve. Dy prej tyre, siç tregohet në video ndodhën në zonën e Evangelistrisë.
Përveç identifikimit dhe arrestimit të individëve, u kryen edhe kontrolle në lokalet dhe shtëpitë e të pandehurve./BalkanWeb
