Kryeministri Edi Rama, gjatë një podcast-i ku i ftuar ishte Kryepeshkopi Joan, ndau kujtime nga një periudhë e vështirë në jetën e tij, kur djali i tij, Gregu, luftonte me një sëmundje të rëndë.
Ai tregoi se situata ishte aq kritike sa Gregu ra në koma, dhe 24 orët e para ishin vendimtare. “Im bir kaloi një moment dramatik me një kancer. Gjërat shkuan aq keq sa u fut në një koma mjekësore farmaceutike. Nuk dihej nëse do të kthehej apo jo. Isha me mjeken dhe e pyeta: ‘Po tani?’ Ajo më tha: ‘24 orët e para çdo lajm do të jetë një lajm i keq. Urojmë që të mos kemi asnjë lajm.’ Ishin 24 orë tmerri, ku çdo moment mund të sillte lajme të rënda,” kujtoi Rama.
Në vijim, ai ndau një bisedë të veçantë me mjeken, e cila e ftoi të lutej. “Kur e pyeta ‘Si vazhdon?’, ajo ngriti kokën dhe bëri me dorë lart. I thashë: ‘Çfarë po më tregon, tavanin? Unë po flas me një shkencëtare, jo me një prift.’ Ajo më tha: ‘Në këtë kat, kati i fëmijëve me kancer, kam parë gjëra që shkenca nuk m’i ka shpjeguar dot.’”
Rama përmendi se spitali kishte një Kapelë, ku mjekja dhe ekipi i saj luteshin për pacientët. “Më sillte njoftime që në një orë të caktuar do të luteshin për Gregun dhe për fëmijë të tjerë. E pyeta: ‘Çfarë lidhje ka kjo me terapinë?’ Ajo më tha: ‘E kemi të nevojshme. Ndihemi më mirë kur e bëjmë, marrim energji.’ Ishte një njeri që besonte. Më thoshte: ‘Quaje si të duash, por unë di që ka mistere dhe nga ajo zonë e misterit vijnë gjëra që nuk i parashikojmë dot.’”
