Një javë pas grabitjes spektakolare në Muzeun e Luvrit, hetuesit francezë kanë bërë përparimet e para të mëdha. Dy persona të dyshuar, të njohur për autoritetet si ekspertë të grabitjeve me kontratë, janë arrestuar dhe ndodhen në paraburgim, njoftoi prokurorja e Parisit, Laure Beccuau.
Njëri prej të dyshuarve u kap në Aeroportin Roissy teksa tentonte të udhëtonte drejt Algjerit, ndërsa tjetri u ndalua në periferi të Parisit, ku përgatitej të largohej drejt Malit. Të dy janë në të tridhjetat dhe me origjinë nga Seine-Saint-Denis, në veri të kryeqytetit francez.
Ata po hetohen për “vjedhje të organizuar” dhe “komplot kriminal”, ndërsa periudha e ndalimit të tyre mund të zgjasë deri në 96 orë.
Gjurmët e ADN-së i tradhtuan
Sipas mediave franceze, dy të ndaluarit u identifikuan falë gjurmëve të ADN-së të gjetura në Galerinë Apollo të Luvrit. Autoritetet besojnë se grupi përbëhej nga katër persona: dy që hynë në galeri përmes një platforme ngritëse dhe dy të tjerë që kujdeseshin për logjistikën dhe arratisjen me një skuter. Dy bashkëpunëtorët e tjerë mbeten ende në arrati.
Xhevahiret e zhdukura – një pasuri prej 88 milionë eurosh
Deri tani nuk është gjetur asnjë nga tetë xhevahiret e vjedhura të Kurorës, me vlerë rreth 88 milionë euro. Në to përfshihen diadema e Perandoreshës Eugenie, e stolisur me afro 2,000 diamante, dhe gjerdani me safir i Mbretëreshës Maria Amalia dhe Mbretëreshës Hortense.
Masat e sigurisë në muze
Ndërkohë, sendet më të çmuara që kanë mbetur në Galerinë Apollo janë zhvendosur për arsye sigurie. Ministri i Brendshëm Laurent Nuñez ka refuzuar kërkesën për ngritjen e një stacioni policie brenda muzeut, duke theksuar se “stacioni aktual ndodhet vetëm pak metra larg”.
“Hetuesit kanë punuar pa u lodhur dhe me vendosmëri,” u shpreh Nuñez në rrjetin X. “Hetimi duhet të vazhdojë me të njëjtin përkushtim dhe në përputhje me konfidencialitetin që kërkon drejtësia.”
📍Burimi: La Repubblica
