Një gomone që vinte nga brigjet shqiptare ka lëshuar sinjal “SOS” pranë brigjeve greke, në zonën detare midis Igumenicës dhe Korfuzit, në vendin e quajtur Prasoudi. Menjëherë drejt vendngjarjes u nisën skafet e policisë së Korfuzit dhe Igumenicës, ndërsa për ndihmë u aktivizua edhe policia kufitare e Sarandës.
Policia greke gjeti në vendngjarje gomonen gjysmë të fundosur dhe drejtuesin e saj, një shtetas shqiptar, i cili u transportua fillimisht drejt Portit të Igumenicës dhe më pas në Spitalin e Filatit për ndihmë mjekësore. Burime paraprake bëjnë me dije se drejtuesi është Edmond Musa, 50 vjeç, nga Saranda, i njohur me pseudonimin “Çimoni”, i skeduar më parë për trafik ndërkombëtar të lëndëve narkotike.
Fillimisht, Musa u arrestua për “kalim i paligjshëm i kufirit” dhe “mbytje të mjetit lundrues”. Por, duke pasur dyshime, policia ktheu gomonen pranë Sajadhës, ku gjatë kontrollit u gjet një sasi e madhe marihuane, e fshehur me kujdes.
Lënda narkotike po transportohet drejt Portit të Igumenicës, ku do të peshohet, ndërsa hetimet për trafikun ndërkombëtar të drogës nga Shqipëria në Greqi janë duke vazhduar.
