Një ligj i ri për shërbimin ushtarak që hyri në fuqi në fillim të vitit 2026 në Gjermani po shkakton debat, pasi parashikon që burrat nën moshën 45 vjeç të marrin miratim nga ushtria për të qëndruar jashtë vendit për më shumë se tre muaj.
Sipas dispozitës së re, çdo shtetas mashkull nga 18 deri në 46 vjeç duhet të kërkojë leje nga qendrat e karrierës së Bundeswehr-it nëse planifikon të largohet për periudha të gjata, qoftë për studime, punë apo udhëtime. Megjithatë, autoritetet ushtarake sqarojnë se kjo leje duhet të jepet në shumicën e rasteve, për sa kohë nuk pritet një thirrje për shërbim gjatë asaj periudhe.
Zëdhënës të ushtrisë gjermane theksuan se masa synon të sigurojë një pasqyrë të saktë të numrit të burrave që ndodhen jashtë vendit në rast emergjencash apo konflikti, në një kohë kur siguria në Evropë është përkeqësuar pas luftës në Ukrainë.
Megjithatë, Ministria e Mbrojtjes pranon se rregulli ka ndikim të madh dhe po punon për përcaktimin e përjashtimeve. Deri më tani nuk janë përcaktuar penalitete konkrete për ata që nuk respektojnë këtë detyrim, ndërsa një dispozitë e ngjashme kishte ekzistuar edhe gjatë Luftës së Ftohtë pa pasoja praktike.
Ligji i ri synon gjithashtu të rrisë numrin e ushtarëve aktivë nga rreth 180 mijë aktualisht në 260 mijë deri në vitin 2035. Shërbimi ushtarak mbetet vullnetar, por nga ky vit të gjithë djemtë që mbushin 18 vjeç duhet të plotësojnë një formular mbi gjendjen shëndetësore dhe gatishmërinë për shërbim. Ndërsa nga mesi i vitit 2027, ata do t’i nënshtrohen edhe një testi fizik për të vlerësuar aftësinë për mobilizim në rast konflikti.
