Kreu i Grupit Parlamentar të Partisë Demokratike, Gazment Bardhi, ka reaguar pas publikimit të raportit final të OSBE/ODIHR-it mbi zgjedhjet parlamentare të 11 majit, duke e cilësuar procesin “një farsë elektorale”.
Bardhi vendos theksin tek qarku i Fierit, ku ai vetë ishte drejtues politik i opozitës dhe ku sfiduesja nga PS, Belinda Balluku, arriti të sigurojë 12 mandate, duke fituar një rezultat të rëndësishëm për mazhorancën. Ai akuzon Ballukun se përdori burime shtetërore, administratën publike, Policinë e Shtetit dhe grupe kriminale për të intimiduar qytetarët dhe punonjësit e bashkive.
Raporti i OSBE/ODIHR-it evidenton presion ndaj punonjësve publikë për të marrë pjesë në aktivitete elektorale të PS-së, kërcënime ndaj votuesve dhe ndërhyrje të padrejtë në procesin zgjedhor, duke përfshirë edhe ndikimin e elementëve kriminalë.
Bardhi thekson se institucionet përgjegjëse si SPAK, KQZ dhe Prokuroria e Përgjithshme dështuan të evidentojnë këto shkelje, duke i dhënë sipas tij një shuplakë drejtësisë.
Ky raport vë në pah rivalitetin e fortë politik në Fier, ku mazhoranca dhe opozita ranë në konflikt të drejtpërdrejtë për kontrollin e mandateve dhe influencës lokale.
