Në datën 2 prill, që shënon Ditën Ndërkombëtare të Kontrollit të Fakteve, gazetarja e Top Channel, Anila Hoxha, u nderua me çmimin “Fatos Baxhaku”. Hoxha u shpall fituese e vendit të parë për investigimin mbi kartelin rus, Khimprom, që zhvillonte aktivitet në Shqipëri.
“Jam e nderuar dhe e privilegjuar për çmimin ‘Fatos Baxhaku’, gazetarit që mbetet dhe do të jetë gjithmonë modeli i gazetarisë që duhet ndjekur. Ai ishte një gazetar i jashtëzakonshëm, që nuk kërkonte protagonizëm, por që përqendrohej te njerëzit dhe historitë që rrëfenin Shqipërinë tonë, jo vetëm në median e shkruar, por edhe në median vizive.
Dokumentarë të tij, si ‘Rrugëtimi’, shfaqur në dy sezone në Top Channel, mbeten të paharrueshëm. Kujtoj pjesë si ‘Kalaja e Ali Pashës’ dhe ‘Jugu i jugut’, ku Fatosi na tregoi se fjala ka po aq rëndësi sa figura në televizion,” tha gazetarja Anila Hoxha.
Në rëndësinë e verifikimit të fakteve, u fokusua gjithashtu drejtoresha e Faktoje, Klodiana Kapo, së bashku me përfaqësues të ambasadave në vend./tch
